आईसीटी समाचार
सञ्चार तथा सूचना प्रविधि मन्त्री रेखा शर्माले सूचना प्रविधिको क्षेत्रमा नेपालले विश्वसँग प्रतिस्पर्धा गर्न सक्ने बताएकी छन् ।
शुक्रबार द सोल्टी काठामाडौंमा आयोजना भएको अपग्राड आईसीटी अवार्ड २०२३ इन एशोशिएसन विथ इन्ड्राइभमा बोल्दै प्रमुख अतिथि शर्माले अन्य उद्योग धन्दाभन्दा सूचना प्रविधिको क्षेत्रमा विश्वसँग प्रतिस्पर्धा गर्न सक्ने बताइन् ।
सूचना प्रविधिको सेवा निर्यात गरेर अर्बौं रकम आम्दानी गरेको उदाहरण दिदै उनले अगाडि भनिन, ‘अन्य उद्योगधन्दा खोल्यो भने विश्वसँग प्रतिस्पर्धासँग गर्न गार्हो छ तर सूचना प्रविधि उद्योगमा हामी विश्वसँग प्रतिस्पर्धा गर्न सक्छौं । यसको पुष्टि पनि भइसकेको छ ।’
देशको आर्थिक रूपान्तरणका लागि सूचना प्रविधिको विकास आवश्यक भएको उनको भनाइ छ । कार्यक्रममा बोल्दै शर्माले सञ्चार तथा सूचना प्रविधि क्षेत्रमा काम गर्ने आईसीटीले अवार्डले हौसला प्रदान गर्नुका साथै राष्ट्रिय तथा अन्तर्राष्ट्रिय स्तरमा प्रतिभा देखाउन सघाउने जानकारी दिइन् ।
डिजिटल रूपान्तरण र डिजिटल इकोसिस्टम विकासमा आईसीटी अवार्डले सहयोग गर्ने बताउँदै शर्माले सरकारले पनि सूचना प्रविधिलाई प्राथमिकता दिएको बताइन् । ‘गैर सरकारी क्षेत्रबाट आईसीटी अवार्डले गरिरहेको काम प्रशंशायोग्य छ,’ मन्त्री शर्माले भनिन, ‘सरकारले पनि पछिल्लो समय सूचना प्रविधिलाई प्राथमिकतामा राखेको छ । मन्त्रालयले पनि सूचना प्रविधिको विकास र विस्तारका लागि काम गरिरहेको छ ।’
आईसीटी क्षेत्रको विकासका लागि समान्य सुधारले मात्रै नपुग्ने अवगत गराउँदै उनले कानुनी र संरचनागत आधार निर्माण गर्ने मन्त्रालयले काम गरिरहेको जानकारी दिइन् ।
२०७६ सालमा सरकारले स्वीकृत गरेको डिजिटल नेपाल फ्रेमवर्कले आशातित गती लिन नसकेको उनले बताइन् । त्यसका लागि १६ औं योजनामा डिजिटल नेपाल फ्रेमवर्कलाई पुनरावलोकन गरेर राख्ने तयारी गरेको समेत जानकारी दिइन् । डिजिटल नेपाल एक्सिलेरेसन परियोजनाका लागि अर्थमन्त्रालयबाट सहमति दिएको जानकारी दिदै उनले अब त्यसबाट विभिन्न कार्यक्रम अगाडि बढाउने बताइन् ।
सरकारले समेत स्टार्टअप, इन्नोभेस र सूचना प्रविधिमा जोड दिएको र आईसीटी एक्जिबिनस, डिजिटल च्याम्पियन र डिजिटल सीप विकास गर्ने कार्यक्रम सञ्चालन गर्न मन्त्रालयले काम गरिरहेको उनको भनाइ छ ।
उनले दशमै सूचना प्रविधि जनशक्ति राख्न कार्यक्रम आवश्यक भइसकेको बताइन् । ‘हामीले दक्षशक्ति उत्पादनमा जोड दिनुपर्छ । दक्ष जनशक्तिलाई देशमै राख्नुपर्छ,’ उनले भनिन्, ‘दक्ष जनशक्तिलाई देशमै राख्न कार्यक्रम अगाडि बढाउने सोचेका छौं । डिजिटल सीप अभिवृद्धि गर्ने तालिम दिने मन्त्रालयको योजना छ । त्यसका लागि अहिले कार्यविधि बनिरहेको छ ।’
