आईसीटी समाचार
काठमाडौं । नेपाली प्रविधि क्षेत्रलाई अन्तर्राष्ट्रिय बजारसँग जोड्ने उद्देश्यले आयोजना गरिएको ‘नेपाल टेक रोडशो युरोप २०२६’ सम्पन्न भएको छ ।
नेपाल एसोसिएसन फर सफ्टवेयर एन्ड आईटी सर्भिसेस कम्पनीज् (नास–आईटी) को आयोजनामा यूके र स्विट्जरल्यान्डमा सञ्चालन भएको रोडशोको अन्तिम कार्यक्रम स्विट्जरल्यान्डको ज्युरिखमा सम्पन्न भएको हो । ज्युरिखमा सेप्टेम्बर १६ मा होटल सेन्ट गटहार्डमा कार्यक्रम आयोजना गरिएको थियो ।
रोडशोमार्फत नेपाली प्रविधि कम्पनी, अन्तर्राष्ट्रिय व्यवसाय, लगानीकर्ता, प्रविधि क्षेत्रका विज्ञ तथा नेपाली डायस्पोराबीच सहकार्य, व्यवसायिक साझेदारी र बजार विस्तारका सम्भावनाबारे छलफल गरिएको थियो । ज्युरिख कार्यक्रममा नेपालका १७ प्रविधि कम्पनीको सहभागिता रहेको थियो ।
रोडशोमा नेपाली प्रविधि क्षेत्रको क्षमता, सफ्टवेयर विकास, आईटी सेवा, आउटसोर्सिङ, आर्टिफिसियल इन्टेलिजेन्स, क्लाउड, साइबर सुरक्षा तथा डिजिटल समाधानका क्षेत्रमा नेपाली कम्पनीले उपलब्ध गराउँदै आएका सेवाबारे प्रस्तुति र अन्तरक्रिया गरिएको थियो ।
कार्यक्रममा व्यवसाय तथा लगानीका सम्भावना, सीमापार सहकार्य, प्रविधि साझेदारी र अन्तर्राष्ट्रिय बजारमा नेपाली आईटी कम्पनीको पहुँच विस्तारका विषयमा छलफल भएको थियो । साथै, सहभागी कम्पनी तथा अन्तर्राष्ट्रिय व्यवसायबीच प्रत्यक्ष व्यवसायिक भेटघाट (बी२बी) र नेटवर्किङका लागि समेत अवसर प्रदान गरिएको थियो ।
ज्युरिखको कार्यक्रम सफल बनाउन स्विस–नेपाल चेम्बर अफ कमर्सको महत्वपूर्ण सहयोग रहेको आयोजकले जनाएको छ । चेम्बरका संस्थापक तथा अध्यक्ष टिजियानो लाभिजारी र कम्युनिकेसन तथा स्टेकहोल्डर रिलेसन्स एडभाइजर सास्कियाले स्विस तथा नेपाली व्यवसायिक समुदायबीच सम्पर्क र सहकार्यका लागि भूमिका खेलेका थिए ।
आयोजकले नेपालको प्रविधि इकोसिस्टमलाई अन्तर्राष्ट्रियस्तरमा विस्तार गर्न सहयोग पुर्याएको भन्दै स्विस एजेन्सी फर डेभलपमेन्ट एन्ड कोअपरेसन (SDC), स्विट्जरल्यान्ड प्रति पनि आभार व्यक्त गरेको छ।
नास–आईटीका अनुसार रोडशोको उद्देश्य नेपाली प्रविधि कम्पनीलाई युरोपेली बजार, लगानीकर्ता तथा सम्भावित साझेदारसँग प्रत्यक्ष जोड्नुका साथै नेपालमा विकास भइरहेको प्रविधि क्षमता र दक्ष जनशक्तिलाई अन्तर्राष्ट्रिय समुदायसमक्ष प्रस्तुत गर्नु रहेको थियो ।
यसअघि रोडशोअन्तर्गत सेप्टेम्बर ९ मा बेलायतको लन्डनमा कार्यक्रम आयोजना गरिएको थियो भने सेप्टेम्बर १६ मा स्विट्जरल्यान्डको ज्युरिखमा अन्तिम कार्यक्रम सम्पन्न भएको हो ।
