आईसीटी समाचार
नेटफ्लिक्सले आईफोन र आईप्याड प्रयोगकर्ताहरूका लागि एउटा नयाँ फिचर सार्वजनिक गरेको छ, जसले एकै ट्यापमा मनपर्ने शोको पूरा सिजन डाउनलोड गर्न मिल्ने सुविधा दिन्छ ।
यो फिचर पहिले मात्र एन्ड्रोइड प्रयोगकर्ताहरूका लागि उपलब्ध थियो । तर अब यसको मजा आईओएस प्रयोगकर्ताहरूले पनि लिन सक्नेछन् । यस फिचरले आईओएस प्रयोगकर्ताहरूको धेरै समय बचाउनेछ ।
नयाँ सिजन डाउनलोड विकल्प शोको डिस्प्ले पेजमा शेयर बटनको छेउमा राखिएको छ, जसले अफलाइन हेर्नका लागि कन्टेन्ट डाउनलोड गर्न सजिलो र छिटो बनाउँछ । यो फिचर विशेष गरी ती व्यक्तिहरूका लागि उपयोगी हुनेछ, जो यात्रा, फ्लाइट वा ट्रिपका दौरान शो वा फिल्मको मजा लिन चाहन्छन्, जहाँ इन्टरनेटको पहुँच हुँदैन् ।
आईओएस उपकरणमा नेटफ्लिक्सको पूरा सिजन डाउनलोड गर्ने फिचर अहिले उपलब्ध छ। यदि तपाईँले यो देख्नुभएको छैन भने, एप स्टोरमा गई नेटफ्लिक्स एप अपडेट गर्नुपर्नेछ ।
नेटफ्लिक्समा अफलाइन हेर्ने सुविधा २०१६ मा सुरु भएको थियो । त्यसपछि कम्पनीले स्मार्ट डाउनलोड जस्ता सुविधा पनि थपेको थियो, जसले हेरिएको एपिसोडलाई स्वतः अर्को एपिसोडबाट बदलिदिन्छ। कम्पनीको नयाँ फिचरको उद्देश्य विश्वव्यापी दर्शकहरूको अनुभवलाई अझ राम्रो बनाउनु हो ।
यस अपडेटसँगै भिडियो स्ट्रिमिङ प्लेटफर्मले सबैभन्दा धेरै डाउनलोड गरिएका सिजनहरूको सूची पनि सार्वजनिक गरेको छ । यसमा सबैभन्दा माथि स्क्विड गेम सिजन १ र २ छन् । त्यसपछि मन्स्टरः द जेफरी डेमर स्टोरी, वान पीस, र क्विन चार्लोटः ए ब्रिजर्टन स्टोरी छन् ।
यो नयाँ फिचर त्यस्तो समयमा आएको हो, जब नेटफ्लिक्सले अमेरिकामा मूल्य बढाएको छ । प्रीमियम विज्ञापन–रहित योजनाको मूल्य अब २४.९९ डलर प्रति महिना भएको छ भने स्ट्यान्डर्ड विज्ञापन–रहित योजना बढेर १७.९९ डलर पुगेको छ ।
