आईसीटी समाचार
काठमाडौं । अमेरिकी कृत्रिम बौद्धिकता (एआई) कम्पनी एन्थ्रोपिकले बजार मूल्याङ्कनका आधारमा विश्वकै सबैभन्दा मूल्यवान् एआई स्टार्टअपको स्थान हासिल गरेको छ । च्याटजिपिटी निर्माता ओपनएआईलाई पछि पार्दै कम्पनीले यो उपलब्धि हासिल गरेको हो ।
कम्पनीले बिहिबार निजी लगानीकर्ताबाट ६५ अर्ब अमेरिकी डलर बराबरको नयाँ लगानी जुटाएको घोषणा गरेको छ । पछिल्लो लगानीपछि एन्थ्रोपिकको कुल मूल्याङ्कन ९६५ अर्ब डलर पुगेको बताइएको छ । यससँगै कम्पनीले एआई उद्योगमा नयाँ उचाइ हासिल गरेको विश्लेषण गरिएको छ ।
यो लगानी चरणको नेतृत्व अल्टिमिटर क्यापिटल, ग्रिनोक्स, ड्र्यागनर तथा सेक्वोइया क्यापिटलले गरेका थिए । पछिल्लो मूल्याङ्कनसँगै एन्थ्रोपिकले बजार पुँजीकरणमा ओपनएआईलाई उछिनेको छ । ओपनएआईको मूल्याङ्कन यस वर्ष मार्चमा ८५२ अर्ब डलर पुगेको थियो ।
एन्थ्रोपिकका सहसंस्थापक तथा प्रमुख कार्यकारी अधिकृत डारियो अमोदेईको नेतृत्वमा कम्पनीले पछिल्ला वर्षहरूमा एआई क्षेत्रमा तीव्र विस्तार गर्दै आएको छ । कम्पनीका प्रमुख वित्तीय अधिकृत कृष्णा रावका अनुसार नयाँ लगानीले अनुसन्धान तथा विकासलाई तीव्रता दिनुका साथै कम्पनीको क्लाउडे (Claude) च्याटबोटलाई थप कार्यस्थल र व्यवसायिक क्षेत्रमा विस्तार गर्न सहयोग पुर्याउनेछ ।
सन् २०२१ मा ओपनएआईका पूर्व अनुसन्धानकर्ताहरूले स्थापना गरेको एन्थ्रोपिक अहिले सिलिकन भ्यालीका अग्रणी एआई कम्पनीमध्ये एक बनेको छ । कम्पनीले आफ्नो क्लाउडे च्याटबोट सन् २०२३ मा सार्वजनिक गरेको थियो, जुन अहिले लोकप्रिय एआई मोडेलमध्ये गनिन्छ । कम्पनीका अनुसार मार्च महिनामा मात्र क्लाउडेमा दैनिक १० लाखभन्दा बढी नयाँ प्रयोगकर्ता दर्ता भइरहेका थिए ।
यद्यपि तीव्र विस्तारसँगै कम्पनीले केही चुनौती पनि सामना गरिरहेको छ । विशेष गरी अमेरिकी राष्ट्रपति डोनाल्ड ट्रम्प प्रशासनसँग एन्थ्रोपिकको सम्बन्ध केही विषयमा तनावपूर्ण बनेको चर्चा छ । अमेरिकी प्रशासनले सैन्य प्रयोजनका लागि आवश्यक उपकरणहरूमा पूर्ण पहुँच नदिएको भन्दै कम्पनीमाथि सप्लाइ चेन जोखिमसम्बन्धी चिन्ता व्यक्त गरेको बताइएको छ ।
यसबीच एन्थ्रोपिकले आफ्नो च्याटबोट क्लाउडेको नयाँ संस्करण ‘Opus 4.8’ पनि सार्वजनिक गरेको छ । कम्पनीले नयाँ संस्करणमा अघिल्लो मोडेलको तुलनामा साना तर स्पष्ट सुधार गरिएको जनाएको छ ।
विश्लेषकहरूका अनुसार एन्थ्रोपिक, ओपनएआई तथा स्पेसएक्स निकट भविष्यमा शेयर बजारमा सूचीकृत हुन सक्ने सम्भावना भएका कम्पनीमध्ये पर्छन् । यदि त्यसो भएमा ती कम्पनीका आईपीओ इतिहासकै ठूला सार्वजनिक निष्कासनमध्ये पर्न सक्ने अनुमान गरिएको छ ।
फ्लोरिडा विश्वविद्यालयका अवकाशप्राप्त प्राध्यापक जे आर रिटरका अनुसार सफ्टवेयर कोडिङ क्षेत्रमा क्लाउडेको बढ्दो प्रयोगले एन्थ्रोपिक प्रति लगानीकर्ताको आकर्षण उल्लेखनीय रूपमा बढाएको छ । उनले एआई क्षेत्रमा केही अग्रणी कम्पनीहरूले भविष्यमा अत्यधिक नाफा कमाउन सक्ने सम्भावना रहेको बताएका छन् ।
