आईसीटी समाचार
ओपनएआईले सोमबार आफ्नो डेभ डे कार्यक्रममा नयाँ एप्स एससीडके घोषणा गर्दै च्याटजीपीटी भित्रै लोकप्रिय तेस्रो-पक्ष एप्स प्रयोग गर्न सकिने सुविधा ल्याएको छ। अब प्रयोगकर्ताहरूले स्पोटीफाई, क्यान्भा लगायतका एप्ससँग सिधै च्याटजीपीटी मार्फत अन्तरक्रिया गर्न सक्नेछन्।
यो नयाँ प्रणालीले च्याटजीपीटी लाई बाह्य एप्ससँग जोड्ने क्षमतासहित ल्याइएको हो। सुरुमा सीमित एप्स उपलब्ध भए पनि, ओपनएआईले समयक्रममा थप एप्स जोड्ने र डेभलपरहरूलाई आफ्नो एपमार्फत आम्दानी गर्न सक्ने दिशामा काम गर्दैछ।
उदाहरणका लागि, प्रयोगकर्ताले च्याटजीपीटी मा लेख्न सक्छन् — ‘Spotify, make a playlist for my party this Friday।’ पहिलो पटक प्रयोग गर्दा च्याटजीपीटी प्रयोगकर्तालाई आफ्नो स्पोटीफाई खाता जडान गर्न अनुरोध गर्नेछ। त्यसपछि च्याटजीपीटी ले मूड, थीम वा विषयका आधारमा सिफारिस तयार पार्छ, जसलाई पछि स्पोटीफाई मा नै सुन्न सकिन्छ।
स्पोटीफाईका अनुसार, ‘यो अझै प्रारम्भिक चरणमा छ। हामी सबै अनुरोधहरू तुरुन्तै पूरा गर्न नसकौंला, तर आगामी हप्ताहरूमा यस अनुभवलाई अझ सुधार गर्दै लग्नेछौं।’
ओपनएआईले कार्यक्रमका दौरान अन्य एप्सको पनि प्रदर्शन गर्यो। कम्पनीका एक कर्मचारीले च्याटजीपीटी सँग कुरा गर्दै कुकुर हिँडाउनको व्यापारका लागि क्यान्भा प्रयोग गरी पोस्टर डिजाइन गरेको देखाए।
हाल च्याटजीपीटी भित्र क्यान्भा, कोर्सेरा, फिग्मा, स्पोटीफाई र जिलो जस्ता एप्स उपलब्ध छन्। निकट हप्ताहरूमा डोरड्यास, ओपन टेबल, टार्गेट र उबर पनि यस प्रणालीमा जोडिनेछन्।
ओपनएआईले यस वर्षकै अन्त्यसम्ममा डेभलपरहरूबाट नयाँ एप्सको सबमिशन लिन सुरु गर्ने र समीक्षा प्रक्रिया पूरा गरी तिनीहरूलाई च्याटजीपीटी भित्र सार्वजनिक गर्ने योजना समेत जनाएको छ।
