आईसीटी समाचार
कम्प्युटर एसोसिएशन नेपाल महासंघ (क्यान महासंघ) का अध्यक्ष रणजित कुमार पोद्दार वर्ल्ड इन्नोभेसन, टेक्नोलोजी एण्ड सर्भिसेस अलायन्स (विस्टा) को कोषाध्यक्षमा निर्विरोध निर्वाचित भएका छन् ।
पोद्दार विश्वका ८० वटा सूचना प्रविधि संस्थाहरुको अन्तराष्टिय संस्था विस्टाको कोषाध्यक्षमा नियुक्त भएका हुन् ।
कम्प्युटर एसोसिएशन नेपाल महासंघ (क्यान महासंघ)का महासचिव चिरन्जीवी अधिकारीले यसले नेपाललाई विश्वव्यापी सूचना प्रविधि क्षेत्रसँग प्रत्यक्ष जोड्न मद्दत गर्ने बताए ।
‘यो आईटी समुदायका लागि निकै महत्वपूर्ण हो । यसले नेपाललाई विश्वव्यापी सूचना प्रविधि क्षेत्रका नवीन प्रविधि र विकाससँग प्रत्यक्ष जोड्न मद्दत गर्नेछ,’ उनले आईसीटी समाचारसँग भने, ‘यसका माध्यमबाट नेपाली आईटी व्यवसाय, स्टार्टअप र संस्थाहरूले विश्व बजारमा प्रतिस्पर्धा गर्न आवश्यक रणनीतिहरू, प्रविधि र साझेदारीको फाइदा उठाउन सक्ने छन् भने नेपाललाई अन्तर्राष्ट्रिय आईटी मञ्चमा थप सशक्त बनाउने र नवप्रवर्तन तथा डिजिटल अर्थतन्त्रको विकासमा टेवा पुर्याउनेछ ।’
विस्टाले विश्वभरी सूचना प्रविधिका क्षेत्रमा भएका नविनतम् प्रयोग र विकासबारे संसारलाई जानकारी गराउने काम गर्दछ ।
साथै, नयाँ नयाँ प्रबिधिका बारेमा खोज अनुसन्धानमा संलग्न हुने र त्यसका लागि विश्व समुदायलाई साथ र सहयोग गर्ने काम पनि यो संगठनले गर्दै आएको छ ।
