आईसीटी समाचार
प्रधानमन्त्री सुशीला कार्कीले आफ्नो आधिकारिक सामाजिक सञ्जाल खाता सञ्चालनमा ल्याएकी छन्। उनले आइतबारदेखि फेसबुक, एक्स (ट्विटर) र इन्स्टाग्राममा आफ्नो नाममा नयाँ ‘अफिसियल’ खाता खोलेकी हुन्।
प्रधानमन्त्रीको सचिवालयका अनुसार, सामाजिक सञ्जालमार्फत जनतासँग प्रत्यक्ष संवाद र जानकारी आदानप्रदान गर्नका लागि यी खाता सञ्चालनमा ल्याइएका हुन्।
सामान्यतया प्रधानमन्त्री पदबाट बिदा हुँदै गर्दा भावी प्रधानमन्त्रीलाई सामाजिक सञ्जालहरूको युजरनेम र पासवर्ड पनि हस्तान्तरण गर्नुपर्छ । किनकि त्यो सरकारको आधिकारिक हुन्छ ।
तर सुशीला कार्कीले भने नयाँ सामाजिक सञ्जाल अकाउन्ट सञ्चालनमा ल्याएकी छन् । आईतबार यस विषयमा प्रधानमन्त्री कार्यालयमा छलफल भएको थियो ।
प्रधानमन्त्री तथा मन्त्रिपरिषद् कार्यालयका प्रवक्ता रबिलाल शर्माका अनुसार पूरानै अकाउन्ट सञ्चालनमा ल्याउने वा नयाँ बनाउने भन्ने विषयमा चर्चा भएको थियो ।
छलफल पश्चात नयाँ अकाउन्ट सञ्चालनमा ल्याइएको उनले बताए । प्रधानमन्त्रीका मुख्य सल्लाहकार अजयभद्र खनालले पनि पूरानो अकाउन्ट प्रयोग गर्दा पहिलेका गतिविधिहरू देखिने भएकाले नयाँ नै अकाउन्ट प्रयोग गर्न सुझाएका थिए ।
निवर्तमान प्रधानमन्त्री केपी शर्मा ओलीको सचिवालयले पनि सबै आधिकारिक सरकारी आईडिया हस्तान्तरण गरेको छैन् । आईतबारसम्म एक्स मात्रै हस्तान्तरण गरिएको बताइएको छ । फेसबुक र इन्स्टाग्राम अझै हस्तान्तरण भएको छैन् ।
साइबर सुरक्षामा प्रश्न
प्रधानमन्त्रीले जीमेल प्रयोग गरेर सामाजिक सञ्जालमा आफ्नो आधिकारिक अकाउन्ट बनाएपछि साइबर सुरक्षामा काम गर्नेहरूले चासो व्यक्त गरेका छन् ।
देशको कार्यकारी प्रमुखले अकाउन्ट बनाउन जीमेल प्रयोग गर्नु साइबर सुरक्षाको दृष्टिकोणले असुरक्षित र उपयुक्त नभएको विज्ञहरूको भनाइ छ ।
साइबर सुरक्षा विज्ञ तथा कम्प्युटर एशोसिएसन नेपाल (क्यान महासंघ) का वरिष्ठ उपाध्यक्ष चिरञ्जीवी अधिकारीका अनुसार सामाजिक सञ्जालमार्फत पारदर्शिता राम्रो पहल भएपनि सरकारले जीमेल प्रयोग बन्द गरी @.gov.np जस्ता डोमेन-आधारित इमेलमा स्थान्तरण गर्नुपर्ने बताए । यसले सुरक्षा र विश्वसनीयता दुवै बढाउने उनको भनाइ छ ।
सरकारको आधिकारिक इमेल प्रणाली .gov.np इमेलको सट्टा सार्वजनिक जीमेलबाट देशको प्रधानमन्त्रीले सामाजिक सञ्जाल अकाउन्ट खोल्नु हास्यास्पद भएको आईटी विज्ञहरूले टिप्पणी गरेका छन् ।
प्रधानमन्त्रीका आधिकारिक अकाउन्ट
एक्स - @pmsushilakarki
फेसबुक - PM Sushila Karki
इन्स्टाग्राम - pm.sushila.karki
