आईसीटी समाचार
नेपाल दूरसञ्चार प्राधिकरणले मोबाइल सिग्नल बुस्टर तथा एमप्लिफायरको प्रयोग गरेमा कारवाही गर्ने चेतावनी दिएको छ ।
सूचना प्रकाशित गर्दै प्राधिकरणले विदेशी दूरसञ्चार सेवा प्रदायकहरुको सेवा प्रयोग गर्न सिग्नल स्ट्रेन्थ बढाउने गरी मोबाइल सिग्नल बुस्टर तथा एमप्लिफायरको प्रयोग भइरहेको जानकारी आएकाले त्यस्तो कार्य नगर्न आग्रह गरेको हो ।
‘नेपालका केही स्थानहरु (सीमावर्ती क्षेत्रहरुमा समेत) विदेशी दूरसञ्चार सेवा प्रदायकहरुको सेवा प्रयोग गर्न Signal Strength बढाउने गरी मोबाइल सिग्नल बुस्टर तथा एमप्लिफायरको प्रयोग भईरहेको भन्ने बुझिन आएको र उक्त कार्य रेडियो ऐन, २०१४ को दफा ३ तथा दूसंचार ऐन, २०५३ को दफा २१ को प्रावधान विपरितको कार्य भएकोले यस्तो कार्य नगर्न/नगराउन सम्बन्धित सबैमा जानकारी गराईन्छ,’ प्राधिकरणको सूचनामा भनिएको छ ।
मोबाइल सिग्नल बुस्टर तथा एमप्लिफायरको प्रयोग गरेको पाईएमा दूरसञ्चार ऐन, २०५३ तथा प्रचलित कानुन बमोजिम कारवाही हुने चेतावनी समेत प्राधिकरणले दिएको छ ।
