आईसीटी समाचार
सरकारले भेन्डरबाट खरिद गरेका सफ्टवेयरहरूको सोर्सकोड मागेर आफै सेवा दिने भएको छ । असोज ७ गते बसेको सचिव बैठकले खरिद गरेका सफ्टवेयरको सोर्स कोड प्राप्त गरी आफ्नै कर्मचारीबाट सेवा दिने व्यवस्था गर्ने निर्णय गरेको हो ।
बैठकले सबै मन्त्रालय/विभाग/कार्यालयहरुले खरिद गरेका सफ्टवेयरको सोर्स कोड प्राप्त गरी आफ्नै कर्मचारीबाट सेवा दिने गरी सफ्टवेयरलाई परिमार्जन/निर्माण गर्ने र सफ्टवेयरको एकीकृत गर्ने कार्य गर्न निर्णय गरेको छ ।
यस कार्यका लागि सञ्चार तथा सूचना प्रविधि मन्त्रालयले आवश्यक समन्वय गर्नेछ । प्रविधिको उपयोग हुने भएकाले प्राविधिक जनशक्ति थप गर्ने गरी एक महिनाभित्र संगठन तथा व्यवस्थापन सर्वेक्षण गर्ने निर्णय समेत सचिव बैठकले गरेको छ ।
अहिले आफुले खरिद गरेका सफ्टवेयरहरूका सोर्स कोड नहुँदा सरकारले धेरै अवरोध खेप्नुपरेको छ र सेवा प्रवाहका लागि ठेकेदारको भर पर्नुपर्ने अवस्था छ । सरकारसँग आफुले खरिद गरेका सफ्टवेयरको सोर्सकोड नहुँदा सरकारी सूचना र तथ्यांकको सुरक्षामै प्रश्न उठ्ने गरेको छ ।
सोर्स कोड भनेको निर्देशनहरूको समूह हो, जसले प्रोग्रामरले कम्प्युटर प्रोग्रामिङ भाषाहरू प्रयोग गरेर लेखिएको हुन्छ । सोर्सकोडमा कार्य, विवरण, परिभाषा, पद्द्ति लगायत अन्य सञ्चालन प्रक्रियाको बारेमा लेखिएको हुन्छ । यसलाई डेभलपर्सले पढ्न र बुझ्न सक्ने ढाँचामा डिजाइन गरिएको हुन्छ ।
यसअघि डेलभलपर्स हुनुपर्नेमा अन्यथा भएकाले सच्याइएको छ - सम्पादक
