आइसिटी समाचार
साझा यातायात सहकारी संस्था लिमिटेडले देशकै ठूलो चार्जिङ क्षमताको विद्युतिय चार्जिङ डिपो सञ्चालनमा ल्याएको छ ।
यातायातले केन्द्रीय कार्यालय परिसर पुल्चोक, ललितपुरमा मंगलबार ११ वटा विद्युतिय चार्जरसहितको डिपो सञ्चालनमा ल्याएको हो ।
उपप्रधान एवम् भौतिक पूर्वाधार तथा यातायात मन्त्री रघुवीर महासेठले सो डिपोको औपचारिक उद्घाटन गरेका थिए । सोही अवसरमा संस्थाको ४० वटा विद्युतिय बसको समेत सेवा शुभारम्भ गरिएको छ ।
जिबिटी टाइपको चार्जिङ पोर्ट रहेको हरेक चार्जरको क्षमता ८८ किलोवाट आवर छ । विद्युत आपूर्तिका लागि ११०० किलोवाट (१.१ मेगावाट) को ४ वटा ट्रान्सफर्मर जडान गरिएको छ । डिपोमा एक पटकमा २२ वटा बस चार्ज गर्न सकिन्छ ।
कार्यक्रमलाई सम्बोधन गर्दै प्रमुख अतिथि उपप्रधान एवम् भौतिक पूर्वाधार तथा यातायात मन्त्री महासेठले सार्वजनिक यातायात सेवालाई व्यवस्थित र सहज तुल्याउनका लागि देशभर नै विद्युतिय बसको सञ्चालनलाई प्राथमिकतामा राखेको बताए ।
यस्तै कार्यक्रमका अतिथि नेपाल विद्युत प्राधिकरणका कार्यकारी निर्देशक कुलमान घिसिङले शुरुवाती समयमा चार्जिङ्ग स्टेशन निर्माणका लागि स्थान अभाव रहने गरेकोमा अहिले स्टेशन निर्माणको क्रमले तीव्रता पाएको र साझाले समेत चार्जिङ्ग स्टेशन निर्माण गरेकाले खुशी लागेको बताए ।
साझा यातायातका अध्यक्ष कनकमणी दीक्षितले चार्जिङ स्टेशनको अभावमा संस्थाका विद्युतिय बस पूर्णरुपमा सञ्चालनमा आउन नसकेकोमा अब भने चार्जिङ्गको समस्या नरहने र बस सेवालाई निरन्तरता दिन सकिने विश्वास समेत व्यक्त गरे ।
यसैगरी साझाले डिजल बसलाई विद्युतिय बसमा रुपान्तरण गर्न सफल भएको बताउँदै यो सफलताबाट यातायात सञ्चालन तथा उत्पादन बारे कार्यशाला आयोजना गरिन लागेको पनि उनले बताए ।
सरकारको नीतिमा डिजल टु विद्युतिय रुपान्तरण परेको भएपनि नियमको अभावमा प्रभावकारी कार्यान्वयन हुन नसकेकाले यसमा सरकारको आवश्यक सहयोगको अपेक्षा रहेको उनको भनाइ छ ।
नेपाल सरकारबाट सार्वजनिक यातायात विद्युतिकरण गर्नका लागि प्राप्त लगानीलाई साझा यातायातले तीन भाग गरी पहिलो भागको खर्चमा ४० बस खरिद गरेको छ। यी विद्युतिय बसहरु उपत्यकाका विभिन्न रुटमा सञ्चालित रहनेछन् ।
विद्युतिय बस ८.५ मिटर लम्बाई, फ्रण्ट र व्याक एयर सस्पेशन लिथियम आइरन फस्फेट व्याट्री (१६१ किलोवाट आवर), भार बोक्ने क्षमता ४७०० किलोग्राम, २४ सिट र उठ्ने बस्ने गरी ५० यात्रु क्षमता, लो फ्लोर, अपाङ्गमैत्री शहरी बस छन् । सिसिटिभी तथा जिपिएस प्रविधि जडान गरिएका यी बसमा डिजिटल डिस्प्लेको समेत व्यवस्था छ ।
१२ मिटरका थप विद्युतिय बस अन्तर्राष्ट्रिय बोलपत्रद्वारा खरिद गर्न साझा यातायातले प्रक्रिया अगाडि बढाइ सकेको छ । यसको साथै विभिन्न प्रान्त जोड्ने 'प्रान्तीय सेवा' अन्तर्गत थप लामो दूरीका सुपर डिलक्स सुविधायुक्त बस खरिद गरी सञ्चालन गर्ने प्रक्रिया पनि अगाडि बढेको छ ।
यस अघि भारतमा निर्मित टाटा र अशोक लेल्याण्ड कम्पनीका ७१ डिजल बस र चीनको सिएचटीसी कम्पनीद्वारा निर्मित यी ४० बस गरी साझा यातायातको कुल संख्या १११ पुगेको छ। यी उपत्यका र उपत्यका बाहिर बाग्लुङ तथा बेलहियासम्म सञ्चालनमा रहेका छन् ।
