आईसीटी समाचार
विश्वचर्चित बिजनेस रियालिटी शो ‘शार्क ट्यांक नेपाल’ हिमालयन टिभीबाट प्रसारण हुने भएको छ । सोमबार शार्क ट्यांक नेपालको औपचारिक घोषणा हुँदैछ ।
यसअघि नै शार्क ट्यांक नेपालको घोषणा गरिएपनि कार्यक्रम प्रसारणमा आउन सकेको थिएन । तर अब भने औपचारिक रूपमा घोषणासँगै हिमालयन टिभीबाट कार्यक्रम प्रसारणमा ल्याउन लागिएको हो ।
उक्त घोषणा कार्यक्रमममा ५ जना शार्क समेत सार्वजनिक गरिने छ । इन्नोभेसन, उद्यमशीलता र लगानीका लागि शार्क ट्यांक नेपाल उपयोगी हुने बताइएको छ ।
शोलाई हिमालय रोडिज फेम्ड सिमोस सुनुवारले निर्देशन गर्ने छन् । एउटा एपिसोडमा पाँच जना उद्यमी गरेर कुल २० एपिसोडमा १०० जना उद्यमीले आफ्नो व्यवसाय र उद्यमशीलताको आइडिया पिच गर्ने जनाइएको छ ।
शार्कबाट उद्यमीका लागि ३५ देखि ४० करोड रुपैयाँ लगानी जुट्ने अपेक्षा गरिएको छ । कार्यक्रमको छायांकन फागुनदेखि गर्ने तयारी छ । कार्यक्रमको छायांकन नयाँ बानेश्वरस्थित एभरेष्ट होटलमा गरिने छ ।
