आईसीटी समाचार
सेन्ट जेभियर्स कलेजले आयोजना गरेको २९औं प्रविधि तथा इन्नोभेसन (सेट) प्रदर्शनी सम्पन्न भएको छ । कलेजको सामाजिक सेवा, वातावरण र प्रविधि (सेट) परिषद्ले आयोजना गरेको प्रदर्शनीमा विद्यार्थीहरूले सामाजिक उत्थान, वातावरण संरक्षण, प्रविधि र इन्नोभेसनका विभिन्न परियोजनाहरू प्रस्तुत गरेका थिए ।
कार्यक्रमका जल रकेट, रोबोटिक हात, एआई प्रवर्द्धित सवारी मोडेलहरू, र पहिरो अलार्म जस्ता प्रविधिहरू प्रदर्शनीमा रहेका थिए । सामाजिक सेवा, वातावरण, र प्रविधि गरी तीन विधामा अन्तर कलेज र कलेजभित्रबाट विभिन्न परियोजनाहरूले प्रतिस्पर्धा गरेका थिए ।
प्रत्येक विधामा तीनजना विजेता घोषित गरिएको थियो । विजेतालाई प्रमाणपत्र, पदक, र नगद पुरस्कार प्रदान गरिएको थियो । साथै, कार्यक्रममा सहभागीहरूले मन पराएको उत्कृष्ट परियोजनालाई पब्लिक च्वाइस अवार्ड प्रदान गरिएको थियो ।
कार्यक्रमका प्रमुख अतिथि शिक्षा, विज्ञान र प्रविधि मन्त्रालयका सहसचिव डा. राजेन्द्र प्रसाद भण्डारीले विद्यार्थीहरू राष्ट्रका आधारस्तम्भ भएको बताउँदै प्रदर्शनीले नवाचारहरू प्रदर्शन गर्ने प्लेटफर्म प्रदान गर्ने बताए ।
