आईसीटी समाचार
टेस्लाले अष्ट्रेलियामा बिक्री भएका पावरवाल २ होम ब्याट्रीहरू फिर्ता बोलाएको छ। अष्ट्रेलियन कम्पिटिसन एण्ड कन्ज्युमर कमिसन (ACCC) का अनुसार कम्पनीले 'सामान्य क्षति' हुने गरी आगलागीका केही घटना दर्ता भएपछि यस्तो कदम चालिएको हो।
यस कदमले सन् २०२० नोभेम्बरदेखि २०२२ जुनबीच अमेरिकामा बनेर अष्ट्रेलियामा बिक्री भएका पावरवाल २ युनिटहरूलाई प्रभाव पार्नेछ। ती ब्याट्रीमा प्रयोग भएका सेलहरू एक अज्ञात तेस्रो पक्ष आपूर्तिकर्ताले बनाएको थियो। यद्यपि, अहिलेसम्म कुनै मानवीय क्षति नभएको एसीसीसीले जनाएको छ।
पावरवाल २ मा १४ किलोवाट-घण्टाका लिथियम आयन ब्याट्री हुन्छ, जसलाई प्रायः सौर्य प्यानलसँगै जडान गरेर दिनभर संकलित अतिरिक्त ऊर्जा भण्डारण गर्न प्रयोग गरिन्छ। साथै, उपभोक्ताहरूले आफ्ना ब्याट्रीलाई भर्चुअल पावर प्लान्टमा सहभागी गराई ग्रिडमा आवश्यक पर्दा ऊर्जा आपूर्ति गर्न सक्ने सुविधा पनि पाउँछन्। यसरी सहभागी हुँदा ब्याट्रीको वारन्टी १५ वर्षसम्म बढ्ने र समयअनुसारको भुक्तानी दरमार्फत ऊर्जा खर्च घटाउने सुविधा प्राप्त हुने टेस्लाले जनाएको छ।
फिर्ता प्रक्रियाअन्तर्गत प्रभावित उपभोक्ताहरूलाई टेस्ला एपमार्फत जानकारी दिइनेछ। कम्पनीले आगलागीको जोखिम घटाउन ब्याट्रीहरूलाई डिस्चार्ज गर्दैछ र प्रभावित ब्याट्रीहरू निःशुल्क प्रतिस्थापन गरिनेछ। साथै, ऊर्जा बचत गुमेको अवस्थामा क्षतिपूर्ति पनि ‘केस-टु-केस’ आधारमा दिने एसीसीसीले जनाएको छ।
