आईसीटी समाचार
ललितपुर महानगरपालिकाले महानगरबासीको गुनासो सुन्न तथा सूचना दिन ‘एलएमसी अलर्ट’ मोबाइल एप सार्वजनिक गरेको छ ।
एलएमसी अलर्टमा महानगरपालिका भित्र आगलागी भएको, ढल, मंगाल फुटेको, विपद व्यवस्थापनको लागि तत्काल गर्नुपर्ने कामदेखि फुटपाथ अतिक्रमण, सार्वजनिक जग्गा अतिक्रमणको गुनासो ३ ट्याप गरेर महानगर प्रहरीलाई सन्देश दिन सकिने छ ।
यसका साथै एपबाटै तत्काल आवश्यक पर्ने सवारी एम्बुलेन्स, दमकल, शववाहन, भेटनेरी एम्बुलेन्स लगायतलाई खबर गर्न सकिने छ । यो एप ललितपुर महानगरपालिकाको महानगर प्रहरीले सञ्चालन गर्नेछ ।
एपबाट २१ वटा सूचना, जानकारी, गुनासो महानगर प्रहरीलाई नोटिफिकेसन आउने गरी व्यवस्था मिलाइएको छ । इन्टरनेट भएको ठाउँमा मोबाइल एपको माध्यमबाट सिधै फोटो र भिडियो र नभएको ठाउँमा स्मार्ट अफलाइन अन गरेपछि एप्लिकेसनले नै दिएको एसएमएस मेसेज गरेपछि सिधै कन्ट्रोल रुममा अलर्ट आउने छ ।
यसरी आएको अलर्ट सिधै नगर प्रहरीको कन्ट्रोल रुममा लोकेसनसहित आउने र तत्काल समस्याको समाधानको लागि ठूलो मद्दत पुग्ने जनाइएको छ । एलएमसी अलर्ट मोबाइल एप डाउनलोड गर्न एन्ड्रोइडमा यहाँ क्लिक गर्नुहोस् भने आईओएसका लागि यहाँ क्लिक गर्नुहोस् ।
