आईसीटी समाचार
अमेरिकाले भेनेजुएलाको राजधानी काराकासमा सैन्य कारबाही गर्दै भेनेजुएलाका राष्ट्रपति निकोलस मदुरोलाई पक्राउ गरेको छ।
यस सैन्य कारबाही अघि अमेरिकाले साइबर आक्रमण गरेर काराकासको विद्युत् आपूर्ति बन्द गराएको दाबी गरिएको छ।
शनिबार मार–ए–लागोमा आयोजित पत्रकार सम्मेलनमा बोल्दै अमेरिकी राष्ट्रपति डोनाल्ड ट्रम्पले त्यसतर्फ संकेत गर्दै कारबाहीका बेला काराकासका अधिकांश भाग अन्धकारमा डुबेको बताएका थिए।
“काराकास अँध्यारो भयो। हामीसँग भएको विशेष प्राविधिक क्षमताका कारण शहरका बत्तीहरू निभेका थिए। त्यो अन्धकार घातक पनि भयो,” ट्रम्पले भने।
अन्धकार भएपछि अमेरिकी लडाकु विमानहरू प्रवेश गरेर रेडार, हवाई प्रतिरक्षा केन्द्र र रेडियो ट्रान्समिसन टावरहरूमा बमबारी गरेका थिए ।
यदि ट्रम्पको दाबी सत्य ठहरिएमा, यो पछिल्लो समय अमेरिकाले अर्को राष्ट्रविरुद्ध सार्वजनिक रूपमा स्वीकार गरेको सबैभन्दा चर्चित साइबर कारबाहीमध्ये एक हुने विश्लेषकहरूको भनाइ छ। यस्ता साइबर अपरेसनहरू सामान्यतया अत्यन्त गोप्य राखिने गरिन्छ, र अमेरिकालाई विश्वकै सबैभन्दा उन्नत साइबर क्षमता भएका देशमध्ये एक मानिन्छ।
उक्त पत्रकार सम्मेलनमै अमेरिकी संयुक्त सेनाका प्रमुख जनरल ड्यान केनले अमेरिकी साइबर कमान्ड, स्पेस कमान्ड तथा अन्य लडाकु कमान्डहरूले विभिन्न ‘प्रभावहरू’ तहगत रूपमा प्रयोग गर्दै प्रारम्भिक चरणमै अमेरिकी सेनाका लागि मार्ग तयार गरिएको जानकारी दिए। तर ती ‘प्रभावहरू’ के थिए भन्नेबारे उनले विस्तृत विवरण खुलाएनन्।
ह्वाइट हाउस, अमेरिकी साइबर कमान्ड र स्पेस कमान्डका प्रवक्ताहरूले यस विषयमा औपचारिक प्रतिक्रिया दिएका छैनन्।
इन्टरनेट निगरानी संस्था नेटब्लक्सले शनिबार बिहान काराकासमा विद्युत् कटौतीसँगै इन्टरनेट कनेक्टिभिटीमा पनि अवरोध देखिएको जनाएको छ। नेटब्लक्सका संस्थापक आल्फ टोकरका अनुसार, यदि साइबर आक्रमणकै कारण यी अवरोधहरू उत्पन्न भएका हुन् भने, ती विशेष रूपमा लक्षित थिए र सम्पूर्ण नेटवर्क प्रणालीमा व्यापक असर परेको देखिँदैन।
यो घटनालाई पछिल्ला हप्ताहरूमा भेनेजुएलाको पूर्वाधारलाई लक्षित गर्दै भएका साइबर गतिविधिहरूको निरन्तरता मानिएको छ। गत महिना भेनेजुएलाको राष्ट्रिय तेल तथा ग्यास कम्पनी पीडीभीएसएले पनि अमेरिकाले साइबर आक्रमण गरी आफ्नो सञ्चालनमा अवरोध पुर्याएको आरोप लगाएको थियो। तर सो आरोपबारे अमेरिकी प्रशासनले सार्वजनिक रूपमा पुष्टि गरेको छैन।
शनिबारको घटनापछि पीडीभीएसएले आफ्ना संरचनामा कुनै भौतिक क्षति नभएको जनाएको छ।
