आईसीटी समाचार
भुटानको स्टार्टअप कम्पनी समूह मिडियाटेकले साउथ एशिया स्टार्टअप आइसिटी अवार्ड २०२३ पाएको छ । शुक्रबार द सोल्टी काठमाडौंमा आयोजना भएको अपग्राड आइसिटी अवार्ड २०२३ इन एशोशिएसन विथ इन्ड्राइभको ग्राण्ड फिनाले कार्यक्रममा समूह मिडिया टेकलाई सो अवार्ड प्रदान गरिएको हो ।
दक्षिण एशियाली देशहरूका स्टार्टअप र इन्नोभेसन प्रवर्द्धन र प्रोत्साहन गर्ने उद्देश्यले गत वर्षदेखि साउथ एशिया स्टार्टअप आइसिटी अवार्ड थप गरिएको थियो ।
यस विधामा नेपाल, भारत, भुटान, बंगलादेश, श्रीलंका, पाकिस्तान, अफगानिस्तान र माल्दिभ्सबाट ६० बढी आवेदन प्राप्त भएका थिए । प्राप्त आवेदनबाट विज्ञ जुरीहरूको निर्णय अनुसार समूह मिडियाटेकले साउथ एशिया स्टार्टअप आइसिटी अवार्ड २०२३ प्राप्त गर्न सफल भएको हो ।
समूह मिडिया टेक भुटानको स्टार्टअप कम्पनी हो । कम्पनीले भुटानको पहिलो ओटीटी प्लेटफर्म समूह सञ्चालन गरिरहेको छ ।
समूहमा भुटानीज फिल्म, टिभी सिरिज, डकुमेन्ट्री, शर्ट फिल्म, म्युजिक भिडियो र एनिमेसन कन्टेन्ट लगायत राखिएको छ । आधिकारिक रूपमा सन् २०२२ मा सार्वजनिक भएको समूह ११७ बढी देशबाट प्रयोग गर्न सकिन्छ ।
यो भुटानको नम्बर वान इन्टरटेनमेन्ट एप हो । विश्वभर १ लाख २० हजार बढी यसका प्रयोगकर्ता रहेका छन् ।
