आईसीटी समाचार
काठमाडौं। प्रविधि पत्रकार मञ्च (टीजेएफ) को ११ औं वार्षिक साधारणसभा सम्पन्न भएको छ। संस्थाले शनिबार काठमाडौंमा साधारसभा सम्पन्न गरेको हो ।
टीजेएफका अध्यक्ष उमेश पौडेलले संस्थाले विगत एक वर्षमा संस्थाले सदस्यहरुको क्षमता अभिवृद्धिका लागि विभिन्न काम गरेको बताए ।
यसका साथै थप तालिम कार्यक्रमहरू, अनुसन्धान परियोजनाहरू, र अन्तर्राष्ट्रिय स्तरमा प्रविधि पत्रकारहरूसँग साझेदारी गर्ने प्रयासमा रहेको उनको भनाइ छ ।
नेपाल सरकारका निकाय तथा अन्य संघ संस्थाहरुसँग पनि सहकार्यका लागि हामी निरन्तर लागि पर्ने उनले बताए ।
उनले आगामी दिनमा संस्थाले अझैं थप कार्यक्रम गर्दै सूचना प्रविधि र यस क्षेत्रमा सक्रिय सञ्चारकर्मीको क्षमता अभवृद्धिमा काम गर्ने बताए ।
संस्थाका पूर्व अध्यक्ष सरु ढकालले संस्था ११ वर्ष पुगेको अवसरमा यसमा आवद्ध र योगदान गर्ने सबैलाई धन्यवाद व्यक्त गरिन् । उनले प्रविधि जसरी अगाडि बढ्छ त्यसरी नै संस्था र आफूहरु पनि अघि बढ्दै जानुपर्ने बताइन्। उनले संस्थाको युनिटीलाई कायम राख्दै अघि बढ्न आग्रह गरिन् ।
संस्थाका पूर्व अध्यक्ष विश्वास रेग्मीले संस्था चलाउने कुरा जटिल भएको बताउँदै संस्थाका सदस्यको क्षमता अभिवृद्धि प्राथमिकतामा हुनुपर्ने बताए ।
यस क्षेत्रमा काम गर्ने सदस्यहरुको आवश्यकता अनुसार प्रभाव पार्ने तालिम प्रदान गरेर अघि बढ्नु पर्ने उनको भनाइ छ । आगामी दिनमा पनि यसरी अघि बढ्नु पर्ने बताउँदै उनले संस्था ११ वर्ष पुगेको अवसरमा सबैलाई शुकामना व्यक्त गरे ।
संस्थाका संस्थाक अध्यक्ष रमेश श्रेष्ठले विगत ११ वर्षमा व्यापक परिवर्तन भएको र त्यसका संवाहक सञ्चारकर्मी पनि भएको बताए । उनले प्रविधि क्षेत्रमा कलम चलाउनु नै सबैभन्दा महत्वपूर्ण भएको बताए ।
उनले अब सूचना प्रविधि क्षेत्रको विस्तार निकै धेरै भएको बताउँदै यस क्षेत्रका सेवा प्रदायक, त्यसको असर, प्रभावलगायत फराकिलो तरिकाले हेर्नु पर्ने बताए । यसका लागि उनले यसकालागि सरकारी, निजी तथा अन्तर्राष्ट्रिय क्षेत्र सँग समन्वय गर्ने सकिने बताए।
उनले दूरसञ्चार क्षेत्रको नीति र कानुन यस्तै रहने हो भने अबको ६/७ वर्षमा यो क्षेत्र संकटमा पर्ने अवस्था रहेको बताए । अहिलेकै अवस्थामा त्यो संकेत स्पष्ट रूपमा देखिएको बताए।
यस्तै संस्थाका निवर्तमान अध्यक्ष गोपाल साउदले संस्थाको उदेश्य र औचित्य के हो भनेर साबित गर्ने तरिकाले काम गर्न जरुरी रहेको बताए ।
उनले हरेक सरकारी र निजी क्षेत्रसँग प्रविधि पूर्ण रूपले जोडिएको बताउँदै यी विषय आमनागरिक सँग पुर्याउन संस्थाले सहकार्य र समन्वय गरी अघि बढ्नु पर्ने बताए।
सन् २०१४ मा स्थापित टीजेएफ सञ्चार तथा सूचना प्रविधि क्षेत्रमा कलम चलाउने दर्जनौं सञ्चारकर्मीको छाता संस्था हो ।
संस्थाले यस क्षेत्रमा कलम चलाउने सञ्चारकर्मीको क्षमता अभिवृद्धिमा काम गर्दै आएको छ।
टीजेएफले प्रविधि एवम नवप्रवर्तन क्षेत्रको विकास एवम् प्रवद्र्धनमा मद्दत गर्दै गर्ने लक्ष्यसमेत राखेको छ ।
