आईसीटी समाचार
दुनियाँको सबैभन्दा ठूलो भिडियो शेयरिङ्ग प्लेटफर्म युट्युबका दीवाना तपाईंलाई हरेक ठाउँमा भेटिन्छन् । यो प्लेटफर्म मनोरञ्जनदेखि लिएर नयाँ–नयाँ कुरा सिक्ने एक उत्कृष्ट माध्यम बनेको छ । यसैक्रममा, बुधबार कम्पनीले जानकारी दिएको छ कि यस प्लेटफर्ममा हालसम्म २० अर्बभन्दा धेरै भिडियो अपलोड भइसकेका छन् । यसको सुरुआत दुई दशकअघि केवल एक डिनर पार्टीमा भएको कुराकानीबाट भएको थियो र आज यस प्लेटफर्मले यति ठूलो उपलब्धि हासिल गरेको छ ।
बुझ्नुपर्ने कुरा के हो भने युट्युबको स्थापना सन् २००५ मा पेपालका पूर्व कर्मचारीहरू स्टीव चेन, चाड हर्ली र जावेद करीमले गरेका थिए । युट्युब डटकम वेबसाइटको सुरुआत भ्यालेन्टाइन्स डे अर्थात् फेब्रुअरी १४, २००५ मा भएको थियो र त्यसपछि अप्रिल २३ मा यस प्लेटफर्ममा पहिलो भिडियो ‘मी एट जू’ सेयर गरिएको थियो । यो १९ सेकेन्डको भिडियो जावेद करीमले अपलोड गरेका थिए जुन अहिलेसम्म ३५६ मिलियनभन्दा बढीपटक हेरिसकिएको छ ।
कम्पनीले यस विशेष अवसरमा जानकारी दिँदै बताएको छ कि युट्युबमा दैनिक औसतमा २ करोड भिडियोहरू अपलोड हुने गर्छन् । यो प्लेटफर्ममा अहिले संगीत भिडियोदेखि लिएर पोडकास्ट, ट्युटोरियल, राजनीतिक विज्ञापन, कन्सर्ट क्लिप्स र धेरै प्रकारका भिडियोहरू हेर्न सकिन्छ ।
त्यस्तै, मार्केट रिसर्च कम्पनी स्टाटिस्टाले जानकारी दिएको छ कि युट्युबले गएको वर्ष विश्वभर २.५ अर्ब दर्शकसम्म आफ्नो पहुँच बनाएको छ । साथै, म्युजिक र प्रिमियम टियरका १० करोडभन्दा बढी सब्सक्राइबर भइसकेका छन् ।
जानकारीअनुसार, युट्युबको सुरुआती यात्रा खासै सहज थिएन र कम्पनीलाई थुप्रै विवादको सामना गर्नुपरेको थियो । खासगरी, प्लेटफर्ममा भएको केही सामग्रीका कारण धेरै आलोचना पनि भएको थियो । तर समयसँगै कम्पनीले केही कडा नियमहरू बनायो र त्यसमा राम्रोसँग नियन्त्रण ल्यायो ।
आजको समयमा युट्युबले नेटफ्लिक्स, डिज्नी र अमेजन प्राइम जस्ता प्लेटफर्महरूलाई कडा टक्कर दिइरहेको देखिन्छ । साथै, यस प्लेटफर्मको शर्ट भिडियो फिचर पनि टिकटक र इन्स्टाग्राम रील्सलाई प्रतिस्पर्धा दिइरहेको छ ।
