आईसीटी समाचार
विश्वकै चर्चित प्रविधि कम्पनीमध्ये एक एप्पलको सुरुवात भएका कम्प्युटरमध्ये एक भिन्टेज एप्पल–१ कम्प्युटर हालै ३७५,००० अमेरिकी डलरमा लिलाम भयो । यो ऐतिहासिक कम्प्युटर स्टीव जब्स र स्टीव वोज्निएकद्वारा बनाइएका सुरुवाती मोडलमध्ये एक हो र कम्प्युटर इतिहासमा एक महत्वपूर्ण उपलब्धि मानिन्छ ।
यस दुर्लभ एप्पल–१ को लिलामी “स्टीभ जब्स एण्ड द एप्पल रिभोल्युसन अक्सन” अन्तर्गत गरियो, जुन आरआर अक्सनले आयोजना गरेको थियो। यस लिलामीमा एप्पलसँग सम्बन्धित धेरै ऐतिहासिक र दुर्लभ सामग्रीहरू समावेश थिए। एप्पल–१ को रेकर्ड नम्बर ३९१ मा दर्ता यो कम्प्युटरको अवस्था १० मध्ये ८.० अंक प्राप्त गरेको छ, जसले यसलाई “उत्कृष्ट” स्थितिको कम्प्युटर बनाएको छ । यसको चिप्स र सर्किट बोर्ड अझै पनि धेरै हदसम्म मौलिक छन् । एप्पल उत्पादन विशेषज्ञ कोरी कोहेनले यसलाई पूर्ण रूपमा कार्यशील अवस्थामा पुनःस्थापित गरेका थिए ।
एप्पल–१ सन् १९७६ मा सार्वजनिक गरिएको थियो र यो एप्पल कम्प्युटर कम्पनीको पहिलो उत्पादन थियो । यसको सुरुवाती मूल्य अमेरिकी डलर ६६६.६६ थियो । त्यो समयमा जम्मा २०० युनिट मात्र निर्माण गरिएका थिए, जसको १७५ युनिट कम्प्युटर प्रविधि प्रेमीहरू र उत्साही प्रयोगकर्ताहरूलाई बिक्री गरिएको थियो ।
त्यस समयमा अन्य कम्प्युटरहरू भन्दा एप्पल–१ निकै फरक थियो किनभने यो पूर्ण रूपमा एसेम्बल गरिएको सर्किट बोर्डसहित आउँथ्यो । तर, यसमा पावर सप्लाई, किबोर्ड र डिस्प्ले अलगै जोड्नुपर्ने आवश्यकता थियो । यो कम्प्युटर एमओएस एसिएस६५०२ प्रोसेसरद्वारा सञ्चालित थियो र ४ केबी र्याम (८केबी सम्म अपग्रेड गर्न मिल्ने) दिइएको थियो ।
एप्पल–१ मा डेटा भण्डारणका लागि क्यासेट टेपको प्रयोग गरिन्थ्यो, र यसले लोअरकेस क्यारेक्टरहरू समर्थन गर्दैनथ्यो । यसमा डिलिट फङ्सन पनि थिएन, जसले गर्दा गल्ती सुधार्न गाह्रो हुन्थ्यो। यद्यपि, त्यो समयको लागि यो व्यक्तिगत कम्प्युटरको दुनियाँमा एक ठूलो नवीनता थियो ।
स्टीव जब्सका कुन–कुन सामग्रीहरू लिलाम भए?
सन् १९७६ मा स्टीव जब्सद्वारा साइन गरिएको चेक, जुन १ लाख १२ हजार डलर मा बिक्री भयो । त्यस्तै, सोही वर्षको अर्को चेक ४६२,५०० डलरमा लिलाम भयो ।
एप्पलको पहिलो पुस्ताको ४ जीबी आइफोन, जुन ४८७,५१४ डलरमा बिक्री भयो ।
एप्पल लिसा कम्प्युटर, जसमा दुर्लभ ‘ट्वीटी’ ड्राइभहरू थिए—यो ग्राफिकल इन्टरफेस भएका पहिलो व्यक्तिगत कम्प्युटरहरूमध्ये एक थियो । यसको मूल्य ४५६,८१८ डलरमा तय गरियो ।
यस्तै, प्रारम्भिक म्याकिन्टोश कम्प्युटरका प्रोटोटाइपहरू र स्टीव जब्सका व्यवसाय कार्डहरू पनि यस लिलामीमा समावेश थिए ।
