आईसीटी समाचार
भिभोले नेपाली बजारमा आफ्नो नयाँ स्मार्टफोन भी ७० सार्वजनिक गरेको छ। कम्पनीले विशेषगरी उच्च गुणस्तरको फोटो तथा भिडियो खिच्न चाहने प्रयोगकर्तालाई लक्षित गर्दै नयाँ मोडेल ल्याएको जनाएको छ।
भिभो भी ७० मा ५० मेगापिक्सलको प्राइमरी सेन्सर (IMX921), ४K भिडियो रेकर्डिङ, र होराइजन लक प्रविधि रहेको छ। कम्पनीका अनुसार यो प्रविधिले फोन हल्लिँदा पनि तस्बिर र भिडियो स्थिर र स्पष्ट राख्न सहयोग गर्छ। रातिको समयमा पनि उज्यालो र विस्तृत फोटो खिच्न सकिने सुविधा यसमा रहेको बताइएको छ।
फोनमा १.५K कर्भ्ड एमोलेड डिस्प्ले र १२०Hz रिफ्रेस रेट छ। त्यस्तै, ५५००mAh ब्याट्री र ८०W फ्ल्यासचार्ज समर्थन गरिएको छ। धुलो र पानीबाट सुरक्षा दिने IP68/IP69 रेटिङ सहित फोनलाई टिकाउ बनाइएको कम्पनीको भनाइ छ।
भिभोका अनुसार भी ७० मा Schott Xensation प्रोटेक्सन ग्लास र कोरोसन–प्रतिरोधी कोटिङ प्रयोग गरिएको छ। नेपाली हावापानी र दैनिक प्रयोगलाई ध्यानमा राखेर फोनको निर्माण गरिएको कम्पनीले जनाएको छ।
नेपाली बजारमा यसको १२GB/२५६GB भेरियन्टको मूल्य रु. ४९,९९९ र १२GB/५१२GB भेरियन्टको मूल्य रु. ६९,९९९ तोकिएको छ।
लन्च अफरअन्तर्गत पहिलो १,२०० ग्राहकले भिभो TWS 3 इयरफोन, पहिलो २,००० ग्राहकले ६ महिनासम्मको एकपटकको स्क्रिन रियर प्रोटेक्सन र ब्याक कभर, तथा ५ जना भाग्यमानी ग्राहकले मोटरसाइकल जित्ने अवसर पाउने छन्। कम्पनीले १२ महिनाको ० प्रतिशत EMI सुविधा पनि उपलब्ध गराएको छ।
भिभो भी ७० अहिले भिभोका आधिकारिक स्टोर, अनलाइन प्लेटफर्म तथा देशभरका खुद्रा विक्रेतामार्फत उपलब्ध छ।
