आईसीटी समाचार
स्मार्टफोन प्रयोग गर्नेहरूका लागि ब्याट्री सधैं सबैभन्दा ठूलो चिन्ताको विषय रहँदै आएको छ। दैनिक रूपमा फोन चार्ज गर्नु एउटा बानी जस्तै बनिसकेको छ। तर अब यो अवस्था परिवर्तन हुँदैछ। कम्पनीहरूले नयाँ ब्याट्री प्रविधिमा काम गरिरहेका छन्, जसले फोनको साइज नबढाई अझ बढी ब्याट्री क्षमता दिने वाचा गरेको छ। यस प्रविधिलाई सिलिकन–कार्बन (एसआई–सी) ब्याट्री भनिन्छ। यो नयाँ स्मार्टफोनहरूमा प्रयोग हुन थालिसकेको छ। हालै, वनप्लस नर्ड ६ (९,००० एमएएच) मा ९,००० एमएएचको ब्याट्री दिइएको छ। सामसुङ ले पनि आफ्ना आगामी स्मार्टफोनहरूमा सिलिकन ब्याट्री ल्याउने तयारी गरिरहेको पुष्टि गरेको छ।
यो ब्याट्री अरूभन्दा फरक कसरी छ?
लिथियम–आयन ब्याट्रीमा ग्रेफाइट प्रयोग गरिन्छ, जहाँ लिथियम आयनहरू घुम्छन् र विद्युत् उत्पादन हुन्छ। तर सिलिकन–कार्बन ब्याट्रीमा ग्रेफाइटको सट्टा सिलिकन प्रयोग गरिन्छ। सिलिकनले ग्रेफाइटको तुलनामा धेरै गुणा बढी लिथियम आयन भण्डारण गर्न सक्छ। सरल रूपमा भन्नुपर्दा, जस्तै एउटा कोठामा बढी मानिस अटाउन सक्छन्, त्यस्तै यस ब्याट्रीमा बढी ऊर्जा भण्डारण गर्न सकिन्छ।
प्रयोगकर्ताले पाउने तीन मुख्य फाइदा
- यस प्रविधिको सबैभन्दा ठूलो फाइदा भनेको फोनको साइज नबढाई ब्याट्री क्षमता बढाउन सकिन्छ। अर्थात्, जहाँ पहिले ५,००० एमएएच ब्याट्री पाइन्थ्यो, अब त्यही साइजमा ६,५०० एमएएच वा त्योभन्दा बढी ब्याट्री दिन सकिन्छ।
- नयाँ प्रविधिसँग कम्पनीहरूसँग दुई विकल्प हुन्छन्—या त ब्याट्री क्षमता बढाएर फोनको ब्याकअप बढाउने, वा ब्याट्री उही राखेर फोनलाई अझ पातलो र हल्का बनाउने।
- यी ब्याट्रीहरू विभिन्न मौसम अवस्थामा पनि राम्रोसँग काम गर्छन्। अत्यधिक जाडो वा गर्मीमा पनि यसको प्रदर्शन स्थिर रहन्छ, र फोन तात्दा चार्जिङ गतिमा कम असर पर्छ।
ठूलो ब्याट्री भएका नयाँ फोनहरू
- वानप्लस १५ (७,३०० एमएएच)
- वानप्लस नर्ड ६ (९,००० एमएएच)
- रियलमी पी४ पावर (१०,००१ एमएएच)
- साओमी १७ प्रो म्याक्स (७,५०० एमएएच)
- ओप्पो फाइन्ड एक्स९ प्रो (७,५०० एमएएच)
एप्पल र गुगलमा कहिले आउने?
२०२६ को सुरुआतसम्म, एप्पल र गुगल ले आफ्ना फ्ल्यागशिप स्मार्टफोनहरूमा सिलिकन–कार्बन (एसआई–सी) ब्याट्री प्रविधि अपनाएका छैनन्। तर, दुवै कम्पनीले सिलिकन–एनोड प्रविधिमा सक्रिय रूपमा अनुसन्धान र परीक्षण गरिरहेका छन्। उद्योगका रिपोर्टहरूका अनुसार, विशेषगरी एप्पलले २०२६–२०२७ को समयसीमाभित्र यस प्रविधितर्फ ठूलो कदम चाल्ने तयारी गरिरहेको छ। यसैबीच, सामसङले कार्बन–सिलिकन ब्याट्रीको परीक्षण समेत गरिसकेको छ।
