आईसीटी समाचार
कहिलेकाहीँ हामीलाई यस्तो लाग्छ कि इन्स्टाग्रामले हाम्रो मनको कुरा नै थाहा पाउँछ। तपाईंले भर्खरै कुनै साथीको साथ कुनै विषयको चर्चा गर्नुुभयो र तुरुन्तै त्यसको विज्ञापन तपाईंको अगाडि आएको हुन्छ। यसैले धेरैलाई लाग्छ कि एपले गोप्य रूपमा हाम्रो कुरा सुन्दैछ। तर सत्यता अरू नै हो। इन्स्टाग्रामका प्रमुख एडम मोसेरीले स्पष्ट रूपमा भनेका छन् कि कम्पनीले तपाईंको माइक्रोफोन प्रयोग गरेर तपाईंको कुरा सुन्दैनन्।
यी विज्ञापन यति सटीक किन हुन्छन्?
इन्स्टाग्रामका प्रमुख एडम मोसेरीका अनुसार एपले निकै सूक्ष्म रूपमा विश्लेषण गर्छ कि तपाईं के कमेन्ट गर्दै हुनुहुन्छ, के सेभ गर्दै हुनुहुन्छ वा के सर्च गर्दै हुनुहुन्छ। त्यति मात्रै होइन, मेटा पिक्सेल र कुकिज मार्फत अन्य वेबसाइटमा तपाईंका गतिविधिहरू पनि ट्र्याक गरिन्छ, जसको परिणाम स्वरूप तपाईंले ‘हाइपर-पर्सनलाइज्ड’ विज्ञापनहरू हेर्नुहुन्छ।
पर्सनलाइज्ड विज्ञापन रोक्न के गर्ने?
यदि तपाईंले यो डेटा ट्र्याकिङ रोक्न चाहनुहुन्छ भने मेटाले फेसबुक र इन्स्टाग्राम दुवैका लागि विज्ञापन सेटिङहरूलाई अकाउन्ट सेन्टर भित्र केन्द्रित गरेको छ। यसलाई नियन्त्रण गर्नका लागि आफ्नै इन्स्टाग्राम प्रोफाइलमा गएर दायाँतर्फको हैमबर्गर मेनुमा ट्याप गर्नुहोस्। यहाँ अकाउन्ट सेन्टर भित्र एड प्रेफेरेन्समा जानुहोस् र म्यानेज इन्फोमा क्लिक गर्नुहोस्। त्यसपछि एक्टिभिटी इन्फर्मेसन फ्राम एड पार्टनर्स रोजेर रिभ्यू सेटिङ्समा क्लिक गर्नुहोस्। अन्ततः “No, don’t make my ads more relevant by using this information” विकल्प चयन गर्नुस्। यसो गर्दा बाह्य गतिविधिहरूको आधारमा तपाईंलाई देखाइने विज्ञापनहरू बन्द हुनेछ।
डाटा प्राइभेसीलाई अझ मजबूत बनाउने अर्को प्रभावकारी तरिका भनेको मेटाको अफ-मेटा एक्टिभिटीलाई डिस्कनेक्ट गर्नु हो। यस सेटिङले मेटालाई अन्य वेबसाइट र एपहरूबाट तपाईंको जानकारी सङ्कलन गर्नबाट रोक्छ। यसको लागि फेरि अकाउन्ट सेन्टरमा जानुहोस् र त्यहाँ योर इन्फर्मेसन एड परमिसन विकल्प छनोट गर्नुहोस्। त्यसपछि योर एक्टिभिटी अफ मेटा टेक्नोलोजिजमा ट्याप गरेर डिस्कनेक्ट स्पेसिफिक एक्टिविटी रोज्नुस् — सुरक्षा कारणले तपाईंसँग पासवर्ड सोध्न सकिन्छ। यदि भविष्यका लागि यो पूर्ण रूपमा बन्द गर्न चाहनुहुन्छ भने म्यानेज फ्यूचर एक्टिभिटीमा गई डिस्कनेक्ट फ्यूचर एक्टिभिटी चयन गर्नुस्। यसले अन्य प्लेटफर्महरूबाट मेटातिर जाने तपाईंको डेटा स्थायी रूपमा रोक्नेछ।
यद्यपि यी सेटिङहरू परिवर्तन गर्दा तपाईंको फिडमा विज्ञापनहरूको संख्या कम हुँदैन — तर विज्ञापनहरूको आधार परिवर्तन हुन्छ। अर्थात् अब ती विज्ञापनहरू तपाईंको रुचि वा ब्राउजिङ इतिहासको आधारमा पर्सनलाइज्ड नहुन सक्छन्। प्राइभेसीको हिसाबले मेटाका नयाँ अपडेटहरू बुझ्नु महत्त्वपूर्ण छ, किनकि कम्पनीले अहिले वाट्सएप स्टेटस र मेटा एआई च्याटबोटसँग हुने तपाईंको कुराकानीहरूको आधारमा पनि विज्ञापन देखाउन थालेको छ। यसैले एउटा प्रो-टिप्: समय-समयमा आफ्नो एड टोपिक्स सेटिङ जाँच गर्दै रहनुहोस्, ताकि तपाईंले ती विषयहरू म्यानुअली हटाउन सक्नुहुनेछ जसमा अब तपाईंको कुनै रुचि नभएको छ।
