आईसीटी समाचार
एलोन मस्कको स्वामित्वमा रहेको सामाजिक सञ्जाल प्लेटफर्म एक्सले प्यारोडी अकाउन्टका लागि प्रोफाइल लेबल लागू गर्न सुरू गरेको छ ।
यसअघि प्रयोगकर्ताहरू प्यारोडी अकाउन्टबाट हुने पोस्टहरूलाई वास्तविक व्यक्तिहरू वा संस्थाहरूको आधिकारिक बयान ठानेर भ्रममा पर्ने गरेका थिए ।
अब भने कुनै पनि पोष्ट वास्तविक अकाउन्टबाट गरिएको हो वा प्यारोडी अकाउन्टबाट गरिएको हो थाहा पाइने छ । लेबल अकाउन्ट र पोस्ट दुबैमा देखिने छ ।
‘हामी प्यारोडी अकाउन्टहरूलाई स्पष्ट रूपमा छुट्याउनका लागि प्रोफाइल लेबलहरू लागू गर्दैछौं । पारदर्शिता बढाउन र प्रयोगकर्ताहरूलाई यस्ता खाताहरू सम्बन्धित व्यक्ति वा संस्थाका हुन् भनेर भ्रममा पर्न नदिन डिजाइन गरिएको हो,’ एक्सको सुरक्षा अकाउन्टबाट गरिएको पोस्टमा भनिएको छ ।
गत नोभेम्बरमा, केही एप रिभर्स इन्जिनियरहरूले एक्सले यस्ता लेबलहरू लागू गर्न योजना बनाइरहेको संकेत गरेका थिए । हालका लागि, खाताहरूले आफैं यी लेबलहरू लागू गर्नुपर्नेछ।
यसका लागि, सुरूमा सेटिङ्स एण्ड प्राइभेसीमा जाने ‘योर अकाउन्टमा’ क्लिक गर्ने र अकाउन्ट इन्फर्मेसनमा जाने । अनि ‘प्यारोडी, कमेन्ट्री र फ्यान अकाउन्टमा’ क्लिक गर्नुपर्नेछ ।
प्यारोडी खाताका लागि लेबल कहिलेदेखि अनिवार्य हुने बारे जानकारी छिट्टै दिने एक्सले जानकारी दिएको छ ।
