अनलाइनबाटै होटल बुकिङ गर्न मिल्ने ‘होटल संसार’, पर्यटन क्षेत्रलाई नै डिजिटाइज गर्ने योजना

नेपाल पर्यटकीय सम्भावानाले भरिपूर्ण देश हो । प्राकृतिक स्रोत र सम्पदाका हिसाबले विश्वमा हामी धनी देश हौं । तर पनि नेपालको पर्यटन क्षेत्रको विकास जति हुनुपर्ने हो, त्यत्ति भएको छैन् ।

यसैबीच पर्यटन क्षेत्रलाई नै डिजिटलाइज गर्ने उद्देश्यले २०७७ असारमा शुरू भएको प्लेटफर्म हो, होटल संसार । होटल संसार एउटा ओटीए (अनलाइन ट्राभल एजेन्ट) प्लेटफर्म हो ।

नेपालमै तयार पार्न सकिने सिस्टम पनि विदेशबाटै ल्याएर प्रयोग गरेको देखेपछि होटल संसारको आईडिया आएको होटल संसारका संस्थापक तथा प्रमुख कार्यकारी अधिकृत (सीईओ) उद्धव अधिकारी बताउँछन् । अधिकारीले झण्डै दुई दशक समय सूचना प्रविधि क्षेत्रमा बिताइसकेका छन् ।

यो अवधिमा उनले देश तथा विदेशका विभिन्न परियोजनामा काम गरिसकेका छन् । सो समयमा नेपालमै विकास गर्न सकिने धेरै परियोजनाहरू पनि विदेशबाट ल्याएर प्रयोग गरेको देखेपछि उनलाई होटल संसारको आइडिया आएको हो । यसले पलायन भइरहेको नेपाली पुँजी केही हदसम्म भएपनि रोक्ने अधिकारीको भनाइ छ ।

‘नेपालका होटलहरूले विदेशी सफ्टवेयर प्रयोग गरिरहेका थिए । कुनै समस्या पर्दा इमेलमा सम्पर्क गर्नुपर्थ्यो । अन्य पहुँच खासै थिएन,’ उनले आइसिटी समाचारसँग भने, ‘त्यो सबै कुरालाई बुझेर नेपालमा नै नेपाली प्रडक्ट बनाउने सोचसहित होटल संसारको अवधारणा आएको हो ।’

अहिले होटल संसारको वेबसाइट र मोबाइल एपबाट होटल बुकिङ गर्न सकिन्छ । यसमा होटलको रेटिङ र ग्राहकको प्रतिक्रिया पनि राखिएको छ । होटल संसार पूर्ण रूपमा नेपालमै बनेको र नेपालको पहिलो ओटीए प्लेटफर्म भएको अधिकारीले बताए ।

होटल संसारबाट होटल बुक गर्दा एटिएम कार्ड, वालेट, भिसा र मास्टरकार्डबाट पैसा तिर्न सकिन्छ । होटल संसारमा आफ्नो होटल आवद्ध गराउनका लागि अनलाइनबाटै पनि रिचआउट गर्न सकिन्छ ।

त्योसँगै देशका मुख्य शहरमा आफ्नै एजेन्टहरू पनि छन् । एजेन्टमार्फत पनि होटल आवद्ध गराउन सकिन्छ । यदि तपाईले अनलाइनबाटै रिचआउट गर्नुभयो भने होटल संसारको एजेन्ट तपाईकहाँ आएर कानूनी प्रक्रिया पुरा गरेपछि होटल संसारमा होटल आवद्ध हुनेछ । कम्पनीले होटलका लागि छुट्टै एपको समेत व्यवस्था गरेको छ ।

होटल संसारमा हाल देशका मुख्य शहरका १ हजारबढी होटलहरू आवद्ध भइसकेको सीईओ अधिकारीले जानकारी दिए । मुख्यतयाः यसमा टुरिष्ट स्ट्याण्डर्डका होटलहरू आवद्ध भएका छन् ।

होटल संसार अहिले आधिकारिक रूपमा सार्वजनिक भइसकेको छैन् । अबको केही समयमै आधिकारिक रूपमा लञ्च गर्ने कम्पनीको योजना छ ।

अहिले ५ हजारबढी एप डाउनलोड भएको छ । एप एन्ड्रोइड र आईओएसमा उपलब्ध रहेको छ । दैनिक २५-३० वटा होटल बुकिङ भइरहेको छ । कम्पनीले होटल बुकिङ गरेवापत १० प्रतिशत होटलसँग कमिसन लिने उनी बताउँछन् ।

होटल संसारमा ६ जना संस्थापक रहेका छन् । अहिलेसम्म उनीहरूले ३ करोडभन्दा बढी लगानी होटल संसारमा गरिसकेका छन् । अहिले कम्पनीमा २५ जनाले रोजगारी पाएका छन् । आफुहरूको योजना नेपालको पर्यटन इकोसिस्टममै काम गर्ने रहेको उनले बताए ।

‘नाम होटल संसार भएपनि हामीले पर्यटन इकोसिस्टमा काम गर्न खोजिरहेका छौं,’ उनी भन्छन्, ‘होटल संसारपछि हामी च्यानल म्यानेजर लिएर आउँदै छौं । त्यसमा अहिले काम भइरहेको छ ।’

साथै पर्यटन क्षेत्रसँग सम्बन्धित सरकारी कामहरू पनि होटल संसारबाटै गर्न मिल्ने गरी सरकारसँग सहकार्य गर्ने कम्पनीको योजना छ ।