आईसीटी समाचार
गत साउन १५ गतेदेखि सुरु भएको राष्ट्रिय स्तरको डेटा साइन्स तथा मेसिन लर्निङ सम्बन्धी भर्चुअल वर्कशप आज पनि जारी रहेको छ । तेस्रो संस्करणको रुपमा आयोजना भएको यो भर्चुअल वर्कशप भोलिसम्म सञ्चालन हुनेछ ।
यो वर्कशप बिहान ८ बजेदेखि दिउँसो ४ बजेसम्म सञ्चालन हुने भनिएता पनि फरक फरक पार्टमा डिभाइड गर्दा बिहान ८ बजेदेखि साँझ ७ बजेसम्म वर्कशप सञ्चालन भइरहेको वर्कशपका संयोजक सुर्य बस्नेतले बताए ।
उनले भने, ‘ स्पीकरहरुले नयाँ नयाँ टपिकमा सेसन दिनु हुन्छ यसमा पनि सुरुमा सैदान्तिक सेसन लिनुहुन्छ अनि त्यसको डेमो पोर्ट देखाउनु हुन्छ । त्यसपछि प्रश्न उत्तरको सेसन हुन्छ । यसले गर्दा सहभागीलाई पनि अझै जानकारी लिन सजिलो हुन्छ भने हामीले उनीहरुलाई प्रोजेक्ट पनि असाइन गरेका हुन्छौं । यसले गर्दा पनि अलि धेरै समय लागेको हो ।’
यस भर्चुअल वर्कशपमा करिब १०० जना जति सहभागी भएका छन् । मेसिन लर्निङ तथा डेटा साइन्सको विषयमा प्यानल डिस्कसन गर्ने कार्यक्रम भोलि रहेको छ ।
अनलाइन मार्फत पनि नेपालमा वर्कशप आयोजना गर्न सकिने रहेछ भनेर आफुहरुले सन्देश दिएको बस्नेतले बताए । अब यो वर्कशपलाई अन्तराष्ट्रिय रुपमा लैजाने योजना रहेको उनले बताए ।
बस्नेतका अनुसार नेपाललाई एआई हब बनाउने टार्गेट रहेको छ । नेपालमा एकलाख एआई इन्जिनियरहरु उत्पादन गर्ने र कम्तिमा पनि २० हजार एआई इन्जिनियरहरुलाई चाही नेपालबाट काम गर्ने गरी बनाउन सक्नु पर्छ भन्ने उदेश्यका साथ आफुहरु अगाडी बढेको उनले जानकारी दिए ।
