आईसीटी समाचार
एचौथो एपिएक आइपीभी–६ काउन्सिल मिट २०२६ सम्पन्न भएको छ। सुबिसु (SUBISU) को आयोजनामा भएको उक्त सम्मेलनमा एसिया–प्रशान्त क्षेत्रका आइपीभी–६ र डीएनएससेक विज्ञहरू सहभागी भएका थिए।दुई दिनसम्म चलेको उक्त बैठकले इन्टरनेट सुरक्षा, लचिलोपन, डिजिटल पूर्वाधार, तथा आईपीभी६ संक्रमणका विविध पक्षहरूमा गहन छलफल गरेको थियो।
बैठकको पहिलो दिन (अप्रिल ९, २०२६) “इन्टरनेट सुरक्षा, लचिलोपन र आईपीभी६ संक्रमण” विषयक अन्तरदृष्टिपूर्ण वार्तालाप केन्द्रित रहेको थियो। सो अवसरमा नीति निर्माता, दूरसञ्चार क्षेत्रका विज्ञ तथा विश्वव्यापी इन्टरनेट समुदायका नेताहरूले सुरक्षित र लचिलो डिजिटल भविष्य निर्माणका लागि आ–आफ्ना धारणा आदानप्रदान गरेका थिए।
दोस्रो दिन (अप्रिल १०, २०२६) को सत्र “डिजिटल पूर्वाधार र इन्टरनेट इकोसिस्टम” शीर्षकमा केन्द्रित थियो। जहाँ शिक्षाविद्, दूरसञ्चार तथा उद्योग क्षेत्रका विज्ञहरूले लचिलो र भविष्यका लागि तयार डिजिटल इकोसिस्टम निर्माणबारे आफ्ना अनुभव तथा सुझावहरू साटासाट गरे। यसैगरी, आईपीभी६ र डीएनएसएसईसी (DNSSEC) को कार्यान्वयन, अनुपालन र व्यावहारिक प्रयोगका रणनीतिहरूमा पनि विशेष जोड दिइएको थियो।
दोस्रो दिनको कार्यक्रममा व्यावहारिक कार्यशाला तथा विज्ञको नेतृत्वमा छलफल सत्रहरू सञ्चालन गरिएका थिए, जसले ज्ञानलाई कार्यान्वयनमा रूपान्तरण गर्न र सुरक्षित, विस्तारशील इन्टरनेट पूर्वाधारलाई सुदृढ बनाउन जोड दिएको थियो।
आयोजकका अनुसार यस बैठकले एपीएसी क्षेत्रमा आईपीभी६ अवलम्बन तथा डिजिटल पूर्वाधार विकासमा नयाँ कोशेढुङ्गा स्थापित गरेको छ। सहभागीहरूले नेपाललगायत एशिया-प्रशान्त क्षेत्रका देशहरूमा डिजिटल सेवाको पहुँच, सुरक्षा र दिगोपनका लागि साझा रोडम्याप बनाउनुपर्ने आवश्यकतामा जोड दिएका छन्।
यसैबीच, बैठकको समापन सत्रमा आयोजकहरूले यस्ता कार्यक्रमले क्षेत्रीय सहकार्यलाई मजबुत बनाउन मद्दत गर्ने बताउँदै अर्को वर्षको बैठकको लागि सहभागीहरूलाई धन्यवाद ज्ञापन गरेका थिए।
