आईसीटी समाचार
लकडाउनले गर्दा आवत जावत ठप्प छ । अत्यावश्यकबाहेक घर बाहिर निस्किन पाइदैन । यो समयमा अनलाइन कक्षा, वर्क फ्रम होम जस्ता कार्यहरु पनि भइरहेका छन् ।
यो बेला समय बिताउने र मनोरञ्जनको एक मात्र माध्यम इन्टरनेट भएको छ । सामाजिक सञ्जालदेखि टिभी चलाउन पनि इन्टरनेट आवश्यक हुन्छ ।
निषेधाज्ञाको यो बेलामा तपाई इन्टरनेट जोड्न, क्षमता वृद्धि गर्न वा बिग्रेको बनाउन चाहनुहुन्छ भने सामान्य अवस्थामा जस्तै सेवा उपलब्ध भइरहेको सेवा प्रदायकहरुले जनाएका छन ।
सरकारले पनि इन्टरनेटलाई अत्यावश्यक सेवाको रुपमा राखेको छ । यसैका कारण पनि इन्टरनेट सेवामा अवरोध नभएको सेवा प्रदायकहरको भनाइ छ ।
यो समय नयाँ इन्टरनेट जोड्ने, क्षमता विस्तार वा परिवर्तन गर्ने उपयुक्त समय भएको सेवा प्रदायकको भनाइ छ ।
निषेधाज्ञाको समयमा अरू बेलाको जस्तै इन्टरनेटको काम भइरहेको वर्ल्डलिंकका निर्देशक लक्ष्मण यादवले बताए। अफिसको नम्बरमा फोन गरेर नयाँ इन्टरनेट जोड्न सकिने उनले बताए ।
‘वर्ल्डलिंकका शाखा कार्यालयमा सम्पर्क गरेर पनि इन्टरनेट जडान गर्न सकिन्छ,’ यादवले भने । यहाँ क्लिक गरेर वल्र्डलिंकलाई सम्पर्क गर्न सकिने छ ।
अर्को इन्टरनेट सेवा प्रदायक सुबिसु केबल नेटका अध्यक्ष सुधिर पराजुलीले पनि पहिलाकै प्रक्रियाअनुसार इन्टरनेट जडान गर्न सकिने बताए ।
‘सुरूमा हाम्रो अफिसको नम्बर फोन गर्नुपर्छ,’ उनले भने, ‘फोन गरेर नाम टिपाएपछि नयाँ इन्टरनेट जडान हुन्छ ।’ त्यस्तै सुबिसलाई पनि यहाँ क्लिक गरेर सम्पर्क गर्न सकिने छ ।
कोरोना महामारीको समयमा सीमित कर्मचारीको उपस्थितिमा सेवा प्रदायकले सेवा प्रदान गरिरहेका छन् । सीमीत जनशक्तिको उपस्थितिमा काम गर्नुपर्ने भएपछि नयाँ इन्टरनेट जडान हुने तर त्यसका केही समय लाग्ने नेपाल टेलिकमका प्रवक्ता राजेश जोशी बताउँछन् ।
‘नयाँ इन्टरनेट जडानका लागि पहिलेको पक्रिया अनुसार अफिसमा फोन गर्न सकिन्छ,’ उनले आइसिटी समाचारसँग भने, ‘चाहेको ठाउँमा हाम्रो नेटवर्क पुगिसकेको छ र हामी दिनलाई तयार छौं भने जडान चाहिँ हुन्छ । तर आजको भोलि नै नहुन सक्छ । अलि बढी समय लाग्न सक्छ ।’
नेपाल टेलिकमले हाल देशका ७३ जिल्लामा फाइबर टु दी होम (एफएफटिएच) सेवा प्रदान गर्दै आएको छ । नयाँ इन्टरनेट जडानका लागि यहाँ क्लिक गरी नेपाल टेलिकमलाई सम्पर्क गर्न सकिने छ ।
हाल मुलुकभर ४० वटा इन्टरनेट सेवा प्रदायकहरु छन् । गत वर्ष कोरोना भाइरस संक्रमण भएर लकडाउन भएपछि इन्टरनेटमा आधारित व्यवसायमा वृद्धि भएको छ ।
साथै, घरमा प्रयोग हुने इन्टरनेटको खपत पनि बढेको छ । खपत बढेसँगै इन्टरनेट जोड्ने ग्राहकमा वृद्धि भइरहेको छ । मुलुकमा कोरोना संक्रमणको दश महिनामा फाइबर नेट बिस्तार उत्साहजनक भएको छ ।
बैशाखदेखि माघसम्म दश महिनामा अग्रणी इन्टरनेट सेवा प्रदायकहरुले फाइबर नेट विस्तारमा ध्यान दिएका छन् ।
मुलुकका अग्रणी इन्टरनेट सेवा प्रदायकहरु वर्ल्डलिंक, नेपाल टेलिकम, भायानेट, सुबिसु, क्लिासिक टेकलगायतका सेवा प्रदायकको ग्राहक संख्यामा उल्लेख्य वृद्धि भएको छ ।
