आईसीटी समाचार
नेपाल टेलिकमको फोरजी आयोजना निकै सुस्त गतिमा अगाडि बढिरहेको छ । फोरजी आयोजना सम्पन्न गर्ने भनेर तोकेको समय ढेड वर्ष घर्किदा पनि पुरा हुन सकेको छैन ।
नेपाल टेलिकमले नेपाल मै पहिलो पटक फोजरी सेवा सुरु गर्दै २०२० फेबु्रअरीमा सम्पन्न गर्ने लक्ष्य राखेको थियो । आयोजना सम्पन्न गर्ने समयभन्दा ढेड वर्षभन्दा धेरै बितिसक्दा पनि आयोजना पुरा हुन सकेको छैन ।
सोमबार पत्रकार भेटघाट कार्यक्रममा नेपाल टेलिकमले फोरजी आयोजना सम्पन्न हुने क्रममा रहेको जानकारी गराएको थियो । कार्यक्रममा टेलिकमका प्रवक्ता राजेश जोशीले फोरजी आयोजनाको भौतिक प्रगति ९७ प्रतिशत पुरा भएको बताए ।
उनका अनुसार मुलुकका ७७ जिल्लाका ७५३ स्थानीय निकायमध्ये ६८२ मा फोरजी पुगेको छ । ति स्थानीय तहमा सबै स्थानमा भने पुग्न सकेको छैन ।
टेलिकमका अनुसार नेटवर्क १ को कुल भौतिक प्रगति ८४ प्रतिशत र नेटवर्क २ को कुल भौतिक प्रगति ८६ प्रतिशत पुरा भएको छ । ४ हजार १ सय ८६ फिजिकल साइटमध्ये ३ हजार ५ सय ४४ साइटहरु अनएयर भइसकेका छन् । यसको अर्थ हो ८५ प्रतिशत साइटमा फोरजी सञ्चालन भएको छ ।
त्यस्तै, ६ हजार ७ सय ३२ लोजिकल साइटमध्ये ५ हजार ९ सय ४३ अर्थात ८८ प्रतिशत अनएर भएका छन्।
महालेखाको ५८ औं वार्षिक प्रतिवेदनले पनि उक्त परियोजना २०२० फेब्रुअरी सभत्र सम्पन्न गरिसक्नुपर्नेमा हालसम्ममा कार्यसम्पन्न नभएको भन्दै सचेत गराएको छ ।
परियोजनाको परिमार्जित कार्यतालिका बनाई लागू पनि नगरेको उसले उल्लेख गरेको छ । सो परियोजनाको ढिलाईले कम्पनीको व्यवसाय र आयआर्जनमा उल्लेखनीय असर पर्ने महालेखाको ठहर छ ।
नेपाल टेलिकमले फोरजी आयोजना सम्पन्न गर्नका लागि १९ अर्ब ६८ करोड खर्च गर्दैछ ।
२०७८ असारसम्म फोरजी चलाउने ग्राहकको संख्या ४७ लाख ४४ हजार ३ सय ७५ पुगेको छ । नेपाल टेलिकमले फोरजी आयोजना सम्पन्न भएपछि फाइभजी परीक्षण कार्य सुरु गर्ने बताएको छ ।
सोमबारको कार्यक्रममा टेलिकम प्रबन्ध निर्देशक डिल्ली अधिकारीले फोरजी आयोजना सम्पन्न हुन लागेको र यो सम्पन्न भएपछि फाइभजी परीक्षणको कार्य सुरु गर्ने जानकारी गराएका थिए ।
