आईसीटी समाचार
नेपालको निजी क्षेत्रको टेलिकम कम्पनी एनसेल आजियाटा लिमिटेडका प्रबन्ध निर्देशक तथा प्रमुख कार्यकारी अधिकृत (सीईओ) एन्डी चोङले ‘टेलिकम सीईओ अफ दि इयर’ को अवार्ड पाएका छन् ।
बेलायतको म्यागजिन ग्लोबल बिजनेस आउटलुकले सन् २०२१ का लागि लिडरसीप विधामा एनसेलका सीईओ चोङलाई ‘टेलिकम सीईओ अफ दि इयर’ को अवार्ड दिएको हो । ग्लोबल बिजनेस आउटलुकले एनसेललाई नेपालको सबैभन्दा सामाजिक उत्तरदायी टेलिकम अवार्ड प्रदान गरेको छ ।
एन्डी चोङ सन् २०१९ को नोभेम्बरमा एनसेलको सीईओको रूपमा नियुक्त भएका थिए । उनी सन् २००८ देखि आजियाटा ग्रुपमा आवद्ध भएका थिए । त्यसपछि उनी सन् २०१४ सम्ममा एसभीपी तथा हेड अफ ग्रुप मार्केटिङ एण्ड अप्रेसनको सन् २०१४ सम्म काम गरेका थिए ।
अनि सन् २०१६ मा इन्टेरिम चीफ कमर्सिएल अफिसरको आजियाटाको एनसेलमा पुनः जोडिएका थिए । त्यसपछि उनले सन् २०१७ मा आजियाटा डिजिटलमा कन्सल्टेन्टको रूपमा पनि काम गरेका थिए ।
फेरी सन् २०१८ मा चिफ कमर्सिएल अफिसरको रूपमा एनसेलमा जोडिएका थिए । चोङले सन् २०१९ को मेमा सीसीओका साथै कार्य बाहक सीईओको भूमिका पनि निर्वाह गरेका थिए ।
उनले व्यवस्थापनमा एमबीए गरेका छन् भने कम्प्युटर सिस्टम र इलेक्ट्रोनिक्समा ब्याचलरमा इन्जिनियरिङ गरेका छन् । उनीसँग टेलिकम्युनिकेसन, आईटी/टेक्नोलोजी र इलेक्ट्रोनिक्सको क्षेत्रमा ३० वर्षभन्दा बढीको व्यवस्थापन र सञ्चालनको अनुभव रहेको छ ।
उनले सीईओ तथा उच्च व्यवस्थापनको नेतृत्वमा मलेसीया, सिंगापुर र इन्डोनेसियामा काम गरिसकेका छन् । एनसेल नेपालको पहिलो निजी क्षेत्रको दूरसञ्चार सेवा प्रदायक कम्पनी हो ।
एनसेलले नेपालमा अहिले आक्रमक रूपमा देशभर फोरजी विस्तार गर्दै आएको छ । साथै कम्पनीले नेपालमा फाइभजी परीक्षणका लागि अनुमति समेत मागेको छ । एनसेल नेपालमा सबैभन्दा धेरै कर तिर्दै आएको एक टेलिकम कम्पनी समेत हो ।
