आईसीटी समाचार
काठमाडौं । युट्युबले आफ्नो सर्ट्स (Shorts) प्लेटफर्ममा प्रयोगकर्ताको अनुभव सुधार गर्न केही नयाँ र आकर्षक फिचरहरू सार्वजनिक गर्ने भएको छ । अब सर्ट्स भिडियोहरूलाई २ गुणा (2x) सम्मको गतिमा हेर्न सकिने सुविधा थपिने भएको छ, जसले प्रयोगकर्तालाई सामाग्री छिटो हेर्न र मनपर्ने भाग सहजै फेला पार्न मद्दत गर्ने कम्पनीले जनाएको छ ।
हट्यो 'डिसलाइक' बटन, थपिए नयाँ विकल्प
यस अपडेटसँगै सर्ट्सबाट परम्परागत ‘डिसलाइक’ बटन हटाइएको छ । अब प्रयोगकर्ताले आफूलाई मन नपर्ने सामाग्रीहरू हटाउनका लागि 'Not interested' र 'Don’t Recommend This Channel' जस्ता विकल्पहरू प्रयोग गर्न सक्नेछन् । साथै, ‘लाइक’ बटनको स्थानमा अब हार्ट (Heart) इमोजी देखिनेछ ।
'क्लियर स्क्रिन मोड'को सुविधा
नयाँ अपडेटमा ‘क्लियर स्क्रिन मोड’ (Clear Screen Mode) पनि थपिएको छ । यसको मद्दतले भिडियो हेर्दा स्क्रिनमा देखिने विभिन्न आइकन र टेक्स्टहरूलाई अस्थायी रूपमा लुकाउन सकिनेछ, जसले गर्दा प्रयोगकर्ताले बिना कुनै अवरोध पूरा भिडियोको आनन्द लिन सक्नेछन् ।
कहिलेदेखि उपलब्ध हुन्छ ?
कम्पनीका अनुसार यी सबै परिवर्तनहरू सर्ट्स प्रयोग गर्ने अनुभवलाई अझ सहज र प्रयोगकर्तामैत्री बनाउनका लागि गरिएका हुन् । यद्यपि, यी अपडेटहरू विश्वभरका सबै प्रयोगकर्ताका लागि कहिलेदेखि पूर्ण रूपमा उपलब्ध हुनेछन् भन्ने निश्चित मिति भने सार्वजनिक गरिएको छैन । युट्युबले यी नयाँ फिचरहरू क्रमिक रूपमा (Roll out) उपलब्ध गराउँदै लैजाने जनाएको छ ।
