आईसीटी समाचार
आर्टिफिशियल इन्टेलिजेन्स (एआई) च्याटबट च्याटजीपीटीले एक व्यक्तिको जीवन बचाएको छ । एक रिपोर्टका अनुसार, च्याटजीपीटीले वर्कआउटपछि बिग्रिएको स्वास्थ्यको कारण गम्भीर र ज्यान लिने खालको रोग पत्ता लगाउन सहयोग गरेको थियो ।
रेडइटमा एक प्रयोगकर्ताले (नाम नखुलाइएको) गरेको पोष्टमा आफुलाई देखिएको लक्षण च्याटजीपीटीलाई भनेपछि तुरून्तै अस्पताल जान सुझाव दिएको बताएका छन् ।
‘मैले आफ्ना लक्षण च्याटजीपीटीलाई भने र यसले मलाई तुरुन्तै अस्पताल जान सल्लाह दियो,’ उनले भनेका छन्, ‘मेरो लक्षण मध्यमदेखि गम्भीर 'र्याब्डोमायोलिसिस’ (Rhabdomyolysis) सँग मिल्दोजुल्दो थियो ।’
खासमा उक्त प्रयोगकर्ताले केही दिनअघि हल्का वर्कआउट गरेका थिए, जसपछि उनको शरीरमा अत्याधिक दुखाइ र असहजता महसुस हुन थालेको थियो । स्वास्थ्य अवस्था बिग्रिएपछि उनले आफ्ना लक्षण च्याटजीपीटीलाई बताएका थिए । त्यसपछि च्याटजीपीटीले उनलाई तुरुन्त अस्पताल जान सल्लाह दिएको थियो ।
च्याटजीपीटीको सल्लाह मान्दै ती व्यक्ति अस्पताल पुगे र स्वास्थ्य परीक्षण गराए । नतिजा स्वरूप उनलाई गम्भीर र्याब्डोमायोलिसिस भएको पुष्टि भएको थियो ।
उनले अगाडि भनेका छन्, ‘अस्पतालमा परीक्षणपछि पत्ता लाग्यो कि मलाई गम्भीर र्याब्डोमायोलिसिस भएको छ । मलाई एक हप्तासम्म अस्पतालमा राखियो, जहाँ आईभी फ्लुइडमार्फत मेरो उपचार र अवस्थाको निगरानी गरिएको थियो ।’
च्याटजीपीटीले उनको ल्याब रिपोर्टहरूको विश्लेषण गर्न पनि मदत गरेको उनको भनाइ छ । जुन डाक्टरहरूले दिएका नतिजासँग मेल खान्थ्यो ।
के हो र्याब्डोमायोलिसिस ?
र्याब्डोमायोलिसिस एक गम्भीर चिकित्सकीय अवस्था हो, जसमा मांसपेशी (Tissue) तीव्र रूपमा बिग्रिन थाल्छ । यसले किड्नी ड्यामेज, मेटाबोलिक एसिडोसिस, र इलेक्ट्रोलाइट असन्तुलन जस्ता समस्या उत्पन्न गर्न सक्छ । समयमै उपचार नभएमा यो ज्यान लिने खालको पनि हुन सक्छ ।
च्याटजीपीटीले बचायो बिरालोको जीवन
एक अर्का प्रयोगकर्ताले पनि आफ्नो बिरालोको उपचारमा च्याटजीपीटीको भूमिका शेयर गरेका छन् । ‘मेरो बिरालोको ज्यान पनि च्याटजीपीटीले बचायो । डाक्टरले बिरालोको खुट्टामा रगतको थक्का भएको बताएका थिए । तर च्याटजीपीटीले उच्च रक्तचापको परीक्षण गराउन सल्लाह दियो । नतिजा स्वरूप सही उपचार पाएपछि मेरो बिरालो बाँच्यो,’ उनले लेखेका छन् ।
के एआईले डाक्टरहरूको ठाउँ लिन सक्छ ?
यस घटनापछि के भविष्यमा एआईले डाक्टरहरूको भूमिकालाई प्रतिस्थापन गर्न सक्छ भन्ने प्रश्न उठेको छ ।
विशेषज्ञहरूले एआई प्रारम्भिक स्क्रिनिङ र चिकित्सा सल्लाहका लागि उपयोगी हुन सक्छ, तर डाक्टरहरूको स्थान लिन नसक्ने बताएका छन् ।
