आईसीटी समाचार
नेपाल उद्योग परिसंघ (सीएनआई) का उपाध्यक्ष हेमराज ढकालले नेपालकाे सूचना प्रविधि क्षेत्रमा लगानी गर्न आग्रह गरेका छन् । बिहीबार टेकपीक नेपाल २०२४ लाई सम्बाेधन गर्दै ढकालले नेपालकाे सूचना प्रविधि क्षेत्रमा प्रचुर सम्भावना रहेकाले विदेशी लगानीकर्तालाई लगानी गर्न विशेष आग्रह गरेका हुन् ।
'नेपालकाे आईटी क्षेत्रले धेरै सम्भावना बाेकेकाे छ । यसलाई हामीले प्रवर्द्धन गर्न जरूरी छ । याे क्षेत्रमा लगानी गरेर फाइदा लिनुहाेस,' उनले अगाडि भने । डेटा सेन्टर राख्नका लागि पनि नेपालकाे तापक्रम उपयुक्त भएकाे बताउँदै उनले यसतर्फ पनि काम गर्नुपर्नेमा जाेड दिए ।
यस्तै कार्यक्रममा बाेल्दै एमचाम नेपालका संस्थापक अध्यक्ष अजित शाहले नेपालमा ८ वटा विश्वै अग्ला हिम श्रीङ्खला भएकाे र आईटी क्षेत्र नवाैं बन्न सक्ने बताए । पछिल्लाे समय चर्चामा रहेकाे प्रविधि एआईले विश्वकाे जीडीपी वृद्धिमा १० प्रतिशत याेगदान गर्ने जानकारी दिदै शाहले नेपालले पनि यसमा काम गर्नुपर्नेमा धारणा राखे ।
‘इग्नाइट इट, इन्भेष्ट इन नेपाल’ भन्ने नारासहित सुरू भएकाे टेकपिकमा नेपालले निर्यात गर्न सक्ने सूचना प्रविधि प्रडक्ट तथा सेवाहरूको सम्भावना बारे छलफल भइरहेकाे छ । नेपालको सूचना तथा सञ्चार प्रविधिको बदलिँदो अवस्थालाई ध्यानमा राख्दै नेपाल उद्योग परिसंघ, अमेरिकन च्याम्बर अफ कमर्स र न्यास आईटीको संयुक्त आयोजना र लगानी बोर्डसँगको सहकार्यमा टेक पिक आयाेजना गरेकाे हाे ।
टेकपीकलाई युएसएआईडी, विश्व बैंक, युरोपेली संघ, ईसीसी, एशियाली विकास बैंक, आईएमई पे, नियोटेरिक, मार्चिङ आन्ट, लक्ष्मी सनराइज बैंक, एनएमबी एस क्यापिटल, एनआईबीएल इक्विटी पार्टनर लगायतका संस्थाको सहयोग रहेको छ ।
