आईसीटी समाचार
नेपालको फिनटेक क्षेत्रमा अग्रणी एफवान सफ्टले आफ्नो प्रमुख सहायक कम्पनी ईसेवाको ८० प्रतिशत सेयर बिक्री गरेको छ । एफवान सफ्ट ग्रुपले आफ्नै शेयरधनीहरूलाई इसेवाको शेयर बिक्री गरेको हो ।
एफवान सफ्टमा रहेको हिस्सेदारी अनुसार इसेवामा पनि आफ्नै शयेरधनीहरूलाई हिस्सेदारी दिइएको छ । यसअघि इसेवामा एफवान सफ्टको शतप्रतिशत स्वामित्व थियो । तर अब भने इसेवामा एफवान सफ्टको २० प्रतिशत मात्रै स्वामित्व रहेन छ ।
ईसेवा, नेपालकै पहिलो डिजिटल वालेट सेवा प्रदायकका साथै एफवान सफ्टको सबैभन्दा बढी नाफा दिने सहायक कम्पनी मध्ये एक हो । पछिल्ला तीन वर्षमा ईसेवाको नाफा ५५ प्रतिशतको वार्षिक वृद्धिदरमा भइरहेको छ ।
८० प्रतिशत स्वामित्व बिक्रीबाट एफवान सफ्टलाई १६७ प्रतिशत लाभ प्राप्त भएको रेटिङ एजेन्सी इक्रा नेपालले जनाएको छ । इक्रा नेपालले एफवान सफ्टलाई ऋणका लागि एल ट्रिपल बी प्लस रेटिङ दिएको छ ।सबैभन्दा नाफा दिने कम्पनीको शेयर बिक्री गरेपछि अब एफवान सफ्टको आम्दानी पनि खुम्चिने आकलन गरिएको छ ।
यस बाहेक कम्पनीले केही समय अगाडि राइड शेयरिङ सेवामा समेत हात हालेको छ । नेपाल मोबिलिटी सोलुसनमार्फत राइड शेयरिङ प्लेटफर्म जुमजुम सञ्चालन गरिरहेको छ । यस परियोजनालाई तत्काल तरलता आवश्यक देखिएकाले पनि नाफा अझै संकुचन आउने बताइएको छ ।
साथै, अन्य भुक्तानी सेवा प्रदायकहरूको बढ्दो प्रतिस्पर्धाका कारण पनि चुनौतीहरू देखा परेका छन् । यद्यपि, कम्पनीले डिजिटल पेमेन्ट इकोसिस्टमका आफ्नो बलियो उपस्थितिले यी चुनौतीहरूलाई केही हदसम्म सन्तुलन गर्न मद्दत गरेको छ ।
एफवान सफ्टमा विश्वास ढकालले ३५ प्रतिशत शेयर रहेको छ । यस बाहेक अस्गर अली, कान्तिपुर मिडिया ग्रुप, सुवास ढकाल र सुवास सापकोटाको हिस्सा रहेको छ ।
एफवान सफ्ट ग्रुप अन्तर्गत ईसेवा, फोनपे, ईसेवा मनि ट्रान्सफर, फोन लोन, फोन नेक्ट्स, कोजेन्ट हेल्थ, फोन पोइन्ट्स, दियालो टेक्नोलोजी, फोन इन्सोरेन्स, एक्टेन्सो डेटा, लोजिका बिन्स, स्वास्तिक कलेज, जुम जुम र ई सेवा ट्राभल एन्ड टूर रहेका छन् ।
