गूगलको जेमिनाई च्याटबट अब सबै एन्ड्रोइड प्रयोगकर्ताहरूलाई निःशुल्क उपलब्ध हुने

गूगलले आफ्नो जेमिनाई एआई–पावर्ड असिस्टेन्टलाई सबै एन्ड्रोइड प्रयोगकर्ताहरूलाई निःशुल्क उपलब्ध गराउँदैछ । कम्पनीले गत महिनामा पिक्सेल ९ सिरिजसँगै गूगल जेमिनाई एआई एपलाई सार्वजनिक गरेको थियो ।

जेमिनाई एपमा आएको यो नयाँ फिचरले प्रयोगकर्ताहरूलाई च्याटबटसँग कुराकानी गर्ने अनुमति दिनेछ । गूगल जेमिनाई एपले एक्समा पोस्ट गरी सबै एन्ड्रोईड प्रयोगकर्ताहरूका लागि गूगल जेमिनाई च्याटबट निःशुल्क उपलब्ध गराउने घोषणा गरेको छ । तर आईफोन प्रयोगकर्ताहरूले अहिलेसम्म जेमिनाई लाइभको निःशुल्क संस्करणको प्रयोग गर्न सक्ने छैनन् ।

गूगल जेमिनाई एपलाई इन्स्टल गरेपछि प्रयोगकर्ताहरूले यस च्याटबटको निःशुल्क प्रयोग गर्न सक्नेछन् । पहिले यो च्याटबट केवल जेमिनाई एभान्स्ड सब्सक्राइबरहरूको लागि मात्र उपलब्ध थियो । हालका लागि, जेमिनाई लाईभ च्याटबट केवल अंग्रेजीमा उपलब्ध छ । 

चाँडै नै निःशुल्क जेमिनाई लाइभ च्याटबोटले अन्य भाषाहरूलाई पनि समर्थन गर्ने आशा गरिएको छ । यसले एन्ड्रोइड स्मार्टफोन प्रयोगकर्ताहरूलाई गूगल जेमिनाई लाइभ एआई असिस्टेन्टसँग कुराकानी गर्न सक्षम बनाउने छ । 

गूगल जेमिनाई च्याटबोटको मद्दतले तपाईंले अनलाइन खोज्नलाई अझै सजिलो बनाउन सक्नुहुनेछ । जस्तै तपाईं जेमिनाईलाई अटोमेटिक मोडमा कमाण्ड दिएर कुनै पनि कुरा खोज्न वा यसको उत्तर सोध्न सक्नुहुनेछ ।

नाइन टू फाइभको रिपोर्ट अनुसार, जेमिनाई लाइभ  फिचर सबै स्मार्टफोनहरूमा जेमिनाई एप्लिकेसनको माध्यमबाट उपलब्ध हुनेछ । जेमिनाई एपमा तल दायाँ कुनामा स्पार्कल आइकनको साथ नयाँ गोलाकार बटनद्वारा यसलाई पहुँच गर्न सकिनेछ ।

जब पनि प्रयोगकर्ताहरूले आइकनमा ट्याप गर्छन्, स्क्रिनको तल ’होल्ड’ र ’एन्ड’ बटनको साथमा डिस्प्ले देखा पर्नेछ । च्याटबटसँगको कुराकानी समाप्त गर्न, तपाईंले नोटिफिकेसन सेक्शनमा गई ’स्टप’ मा क्लिक गर्नुपर्नेछ ।