आईसीटी समाचार
नेपालको प्रविधि कम्पनी स्वीभ्ट र इन्भेस्टियाको संयुक्त आयोजनामा आन्टरप्रेनर समिट नेपाल २०२४ हुने भएको छ । असोज १९ गते काठमाडौंको सोल्टी होटलमा हुने सम्मेलनमा राष्ट्रिय तथा अन्तर्राष्ट्रिय वक्ताहरूको सहभागीता रहने छ ।
एशिया प्रशान्त क्षेत्र (एप्याक) का उद्यमी, लगानीकर्ता, र व्यवसायिक नेतृत्वकर्ताहरूलाई एक ठाउँमा ल्याउने उद्देश्यसहित सम्मेलन हुन लागेको हो । यसले नेपालमा विदेशी लगानी र अवसरहरू सिर्जना गर्न समिट महत्वपूर्ण हुने आयोजकको विश्वास छ ।
सम्मेलनमा एक्सिलेरेट भेन्चर्सका सह–संस्थापक र प्रबन्धक साझेदार लिओ लिउ, एसिया सीईओ कम्युनिटी हङकङका संस्थापक र सिईओ ग्यारी लाम, एक्सिलेरेट, हङकङका लविन हेलमानी र फिनटेक ग्लोबल बैंकिङ सोलुसन्स बेलायतका माइकल हो लगायत अन्तर्राष्ट्रिय वक्ताहरू सहभागी हुनेछन् ।
कार्यक्रममा नेपाल उद्योग वाणिज्य महासंघका अध्यक्ष चन्द्रप्रसाद ढकाल र नेपाल लगानी बोर्डका सिईओ सुशील ज्ञवाली पनि सहभागी हुने अपेक्षा गरिएको छ ।
हङकङ, सिंगापुर, भारत र नेपालका प्रतिष्ठित व्यवसायिक व्यक्तित्वहरू सहभागी हुने कार्यक्रममा नेपालको उद्यमशीलताका सम्भावनाबारे छलफल हुनेछ । कार्यक्रमले स्टार्टअप संस्थापक, व्यवसायिक नेतृत्वकर्ता र लगानीकर्ताहरूलाई नेटवर्किङ, रणनीति साझेदारी, र भविष्यका लागि सार्थक सहकार्यको अवसर प्रदान गर्नेछ ।
स्वीभ्टले गत वर्ष फिनटेक सम्मेलनको रूपमा पिएसपी सम्मेलन २०२३ आयोजना गरेको थियो । सो सम्मेलनमा इसेवा, खल्ती, फोनपे, मोरु, डिजिपे, सिजीपे, आईपे जस्ता प्रमुख फिनटेक कम्पनीहरू र नबिल बैंक, ग्लोबल बैंक, सिटिजन बैंक जस्ता ठूला वित्तीय संस्थाहरूले भाग लिएका थिए ।
यस पटकको उद्यमी शिखर सम्मेलन २०२४ मा नेपालको स्टार्टअप इकोसिस्टमलाई विश्वव्यापी मञ्चमा स्थापित गर्न महत्वपूर्ण भूमिका खेल्ने विश्वास गरिएको छ । समिटमा सहभागीता जनाउन टिकट काट्नु पर्नेछ । टिकट यहाँ क्लिक गरेर खरिद गर्न सकिने छ ।
साथै यदी उक्त सम्मेलनमा स्टार्टअप शोकेस गर्न चाहनुहुन्छ भने यहाँ क्लिक गरेर आफ्नो स्टल सुरक्षित गर्न सकिने छ ।
