आईसीटी समाचार
एप्पलका डिभाइसहरू आफ्नो बलियो सुरक्षा प्रणालीका कारण प्रख्यात छन् । एप्पलका डिभाइसलाई ह्याक गर्नु निकै कठिन मानिन्छ ।
आईफोनसहित एप्पलका सबै डिभाइस सुरक्षित भएका कारण एप्पलका उत्पादनहरू खरिद गर्न रुचाउँने धेरै तर्क पनि छ । तर, हालैको एक रिपोर्टले आईफोनलाई यूएसबी पोर्टमार्फत ह्याक गर्न सकिने बताएको छ ।
यो रिपोर्टमा अनुसन्धानकर्ताहरूले केही कमजोरीहरू फेला पारेका छन् । यो रिपोर्टमा के भनिएको छ, आउनुहोस् जानौँ ।
हार्डवेयर सुरक्षाबारे जानकारी दिने थोमस रोथले बताए अनुसार, युएसबी पोर्ट भएको आईफोनमा चार्जिङ पोर्टमार्फत ह्याकरहरूले सुरक्षामा चुनौती ल्याउन सक्छन् । यी सुरक्षा कमजोरीहरू एप्पलको एसीई ३ यूएसबी–सी कन्ट्रोलरमा फेला परेका छन् । यो कन्ट्रोलर आईफोनमा चार्जिङ र डाटा ट्रान्सफरको लागि आवश्यक कम्पोनेन्ट हो ।
डिसेम्बरको अन्त्यमा ३८औँ कैओस कम्युनिकेसन कांग्रेसमा पहिलो पटक यसको खुलासा गरिएको थियो । तर, हालै यसबारे विस्तृत विवरण सार्वजनिक गरिएको छ । यसका अनुसार, यो पोर्ट ह्याकरहरूलाई डिभाइस ह्याक गर्न सजिलो बनाउने खालको हुन सक्छ ।
सुरक्षा अनुसन्धानकर्ता थोमस रोथले यी टेक्निकल कमजोरीहरूबारे जानकारी दिएका छन् । उनले इन्टरनल फर्मवेयर र कम्युनिकेसन प्रोटोकलको अध्ययन गरेर यी कमजोरीहरूको फाइदा उठाएर कन्ट्रोलरमा नयाँ परीक्षणहरू गरेका थिए, जसमा उनी सफल भए । यसपछि यी कमजोरीहरूको उपयोग गरेर सुरक्षा प्रणालीलाई असर पुर्याउन सकिने पुष्टि भएको थियो ।
रोथले पत्ता लगाए कि फर्मवेयरमा रहेका सुरक्षा कमजोरीहरूले ह्याकरलाई डिभाइसमा रहेको संवेदनशील जानकारीसम्म पहुँच दिन सक्छ । प्रयोगकर्ताको अनुमति बिना नै निजी जानकारीमा पहुँच पाउन सकिन्छ ।
एप्पलको एसीई थ्री यूएसबी–सी कन्ट्रोलरमा कमजोरी भएका कारण डिभाइस हेरफेर र अन्य जोखिम हुन सक्छ । ह्याकरहरूले डाटा ट्रान्सफरको क्रममा व्यक्तिगत जानकारी चोरी गर्न वा सुरक्षा प्रोटोकललाई बेवास्ता गरेर डिभाइसमा अनधिकृत एप्लिकेसनहरू इन्स्टल गर्न सक्छन् ।
तर, रिपोर्टले आईफोन प्रयोगकर्ताहरूले चिन्ता लिनु आवश्यक नभएको तथा यो प्रक्रिया अत्यन्त कठिन र सबैको पहुँचमा नरहेको जानकारी दिएको छ ।
