आईसीटी समाचार
काठमाडौं विश्वविद्यालय (केयू) हल्ट प्राइजले इनर्जाइज नेपाल र काठमाडौं युनिभर्सिटी बिजनेस इन्क्युबेशन सेन्टर (क्यूबिक) सँगको सहकार्यमा आयोजना गरेको ‘इम्प्याक्ट अपः स्टार्टअप एन्ड एसएमई मिट’ कार्यक्रम सम्पन्न भएको छ ।
काठमाडौं विश्वविद्यालय धुलिखेलमा आयोजना भएको कार्यक्रममा २१ स्टार्टअप, एसएमई र केयू विद्यार्थीहरू लगायतको सहभागिता रहेको थियो ।
नेपालमा सामाजिक उद्यमशीलता, स्टार्टअप र एसएमईको इकोसिस्टमलाई प्रवर्द्धन गर्ने उद्देश्यका साथ आयोजित कार्यक्रममा प्रमुख अतिथिको उद्योग वाणिज्य महासंघ काभ्रेका उपाध्यक्ष कैलास पालंचोकी उपस्थित थिए ।
यसमा स्टार्टअप, उद्यमी, र विद्यार्थीहरूलाई ५-५ जनाको समूहमा विभाजित गरी उद्यमशीलता बारे राउन्ड टेबल छलफल समेत भएको थियो । यस बाहेक स्टार्टअप इकोसिस्टम, लगानी र नीतिका विषयमा प्यानल डिस्कसन समेत भएको जनाइएको छ ।
इम्प्याक्ट अप: स्टार्टअप र एसएमईहरू मिट कार्यक्रमले स्थानीय र राष्ट्रिय स्तरमा उद्यमी र स्टार्टअप लागि एउटा प्लेटफर्म प्रदान गरेको आयोजकको भनाइ छ ।
