आईसीटी समाचार
ओपन एआइको समस्या अझै बढ्न सक्ने देखिएको छ । ओपनएआईका सीईओ साम अल्टम्यानलाई बर्खास्त गरेपछि ५०० भन्दा बढी कर्मचारीले बोर्डलाई हटाउन माग गरेका छन् ।
साम ओल्टम्यानलाई बर्खास्त गरेपछि अब नयाँ सीईओको नाम पनि सार्वजनिक भएको छ । ट्विचका सह–संस्थापक एमेट शियरले सीईओको रूपमा पदभार ग्रहण गर्न सक्छन् । तर, बिहीबार साम ओल्टम्यानलाई पदबाट बर्खास्त गरेपछि मीरा मुरत्तीले पद सम्हाल्दै आएकी थिइन् ।
ओपनएआईका ५०० भन्दा बढी कर्मचारीले सामूहिक राजीनामा दिने धम्की दिएपछि कम्पनीको भविष्य अन्योलमा परेको देखिन्छ । कर्मचारीहरूले कम्पनीलाई बोर्डले राजीनामा दिनुपर्छ अन्यथा माइक्रोसफ्टमा आबद्ध हुने चेतावनी दिएका छन् ।
कम्पनीलाई लेखिएको पत्रमा कर्मचारीहरूले स्पष्ट पारेका छन् कि यदि उनीहरूको माग सुनिएन भने, उनीहरूले राजीनामा दिन र माइक्रोसफ्टको नयाँ एआई इकाईमा सामेल हुन सक्छन् । वाल स्ट्रीट जर्नलका अनुसार ओपनएआईमा करिब ७७० कर्मचारी छन् ।
बोर्डले कम्पनीको अनुगमन गर्न नसकेको कर्मचारीहरुले बताएका छन् । पत्रका अनुसार बोर्डबाट सीईओ अल्टम्यान र सहसंस्थापक ग्रेग ब्रोकम्यानलाई हटाइएपछि काम प्रभावित भएको हो ।
