आईसीटी समाचार
काठमाडौं । नागढुंगा सुरुङमार्गमा यात्रा गर्ने यात्रुले अब नेपाल टेलिकमको मोबाइल नेटवर्कमार्फत सहजै सम्पर्क गर्न सक्ने भएका छन् । नेपाल टेलिकमले हालै सञ्चालनमा आएको सुरुङमार्गभित्र टुजी र फोरजी मोबाइल सेवा विस्तार गरेको जनाएको छ ।
सुरुङमार्गभित्र मात्र होइन, आसपासका क्षेत्रमा समेत मोबाइल कभरेज उपलब्ध गराइएको छ । साथै सुरुङमार्गसँग सम्बन्धित कार्यालयका लागि टेलिफोन, एफटीटीएच इन्टरनेट तथा लिज लाइन सेवा पनि सञ्चालनमा ल्याइएको कम्पनीले जनाएको छ ।
मोबाइल नेटवर्कलाई प्रभावकारी बनाउन सुरुङमार्गको काठमाडौं र धादिङ दुवैतर्फ आवश्यक बीटीएस स्थापना गरिएको छ । काठमाडौंतर्फको पूर्वी भाग र धादिङतर्फको पश्चिमी भागमा राखिएका बीटीएसमार्फत सुरुङभित्र मोबाइल नेटवर्क उपलब्ध गराइएको हो ।
नेटवर्कलाई निरन्तर सञ्चालनमा राख्न दुवैतर्फबाट अप्टिकल फाइबरमार्फत कनेक्टिभिटी जोडिएको छ । वैकल्पिक नेटवर्क लिंकको व्यवस्था गरिएकाले कुनै एकतर्फको फाइबर लिंकमा समस्या आएपनि अर्को लिंकमार्फत सेवा सञ्चालन हुन सक्ने व्यवस्था मिलाइएको नेपाल टेलिकमले जनाएको छ ।
विशेष गरी सुरुङमार्गभित्र सवारी साधन रोकिएको वा कुनै आपतकालीन अवस्था सिर्जना भएको समयमा यात्रुले मोबाइल नेटवर्कमार्फत आवश्यक सम्पर्क गर्न सक्ने अपेक्षा गरिएको छ ।
