आईसीटी समाचार
काठमाडौं । प्रविधि, डिजिटल ट्रान्सफर्मेसन, कृत्रिम बुद्धिमत्ता (एआई), मार्केटिङ तथा नवप्रवर्तन क्षेत्रमा कार्यरत कम्पनी प्रिक्साले आफ्नो सेवा र उपस्थितिलाई पोखरासम्म विस्तार गरेको घोषणा गरेको छ ।
कम्पनीले सामाजिक सञ्जालमार्फत सार्वजनिक गरेको जानकारीअनुसार, भौगोलिक सीमाभन्दा पनि प्रतिभा, अवसर र अगाडि बढ्ने इच्छाशक्तिलाई प्राथमिकता दिँदै पोखरामा आफ्नो उपस्थिति विस्तार गरिएको हो ।
प्रिक्साले पोखरालाई प्रतिभाशाली जनशक्ति, सिर्जनशीलता, उद्यमशील सोच र महत्वाकांक्षाले भरिएको शहरका रूपमा उल्लेख गर्दै, यहाँको विस्तार केवल नयाँ कार्यालय स्थापना मात्र नभई स्थानीय प्रतिभालाई आफ्नै क्षेत्रमा अवसर सिर्जना गर्ने प्रतिबद्धताको प्रतीक भएको जनाएको छ ।
कम्पनीका अनुसार प्रविधि, डिजिटल रूपान्तरण, एआई, मार्केटिङ र नवप्रवर्तनका क्षेत्रमा आफ्नो सेवा र परियोजनालाई थप विस्तार गर्दै स्थानीय स्तरमै रोजगारी, सीप विकास र नवप्रवर्तनलाई प्रोत्साहन गर्ने लक्ष्य राखिएको छ ।
"विकास कहिल्यै भौगोलिक सीमामा निर्भर हुँदैन, यो सधैं मानिस, अवसर र अगाडि बढ्ने इच्छाशक्तिमा आधारित हुन्छ," कम्पनीले आफ्नो सन्देशमा उल्लेख गरेको छ ।
प्रिक्साले पोखराबाट प्रविधिमा आधारित नवीन समाधान विकास गर्दै दीर्घकालीन प्रभाव सिर्जना गर्ने प्रतिबद्धता व्यक्त गरेको छ । कम्पनीले यो विस्तार आफ्नो यात्राको सुरुवात मात्र भएको उल्लेख गर्दै आगामी दिनमा थप अवसर र नवप्रवर्तनका पहलहरू अघि बढाइने जनाएको छ ।
