आईसीटी समाचार
संयुक्त अरब इमिरेट्स (यूएई) को अबुधाबीमा २०२५ पब्जी मोबाइल सुपर लिग सेन्ट्रल एन्ड साउथ एशिया फल सिजन सम्पन्न भएको छ। प्रतियोगिताको यो सिजन तीव्र प्रतिस्पर्धा, रणनीति र अविस्मरणीय क्षणहरूले भरिपूर्ण रहेको थियो।
६ दिनसम्म चलेको यस रोमाञ्चक सिजनपछि जम्मा ६ टोलीले प्रतिष्ठित २०२५ पब्जी मोबाइल ग्लोबल च्याम्पियनसिप (PMGC) का लागि आफ्नो स्थान सुरक्षित गरेका छन्।
भर्चस.प्रो, अल्फा गेमिङ र म्याड बुल्सले आफ्नो उत्कृष्ट रैंकिङ आधारमा पीएमजीसी गन्टलेट स्टेजमा स्थान पाएका छन् भने आर्क्रेड, इनर सर्कल र गोटले आफ्नो पीएमजिसी रेटिङ पोइन्ट्सका आधारमा पीएमजिसी ग्रुप स्टेजमा स्थान सुरक्षित गरेका छन्।
नेपालबाट होरा इ–स्पोर्ट्स, फोर योनको रोयल जुत्ती र नेपेक्स इ–स्पोर्ट्सले पीएमएसएल ग्रुप स्टेजमा नेपालको राम्रो प्रतिनिधित्व गरेका थिए।
असाधारण टिमवर्क र कौशल प्रदर्शन गर्दै होरा इ–स्पोर्ट्स र फोर योनको रोयल जुत्ती दुबै टोलीले अन्तिम चरणसम्मको यात्रा तय गरे, जसले अन्तर्राष्ट्रिय मञ्चमा नेपाली इ–स्पोर्ट्स समुदायको बढ्दो क्षमता र प्रभावलाई प्रदर्शन गरेको थियो।
नेपाली टोलीहरू मध्ये होरा इ–स्पोर्ट्सले उत्कृष्ट प्रदर्शन गर्दै अमेरिकी डलर ११,७५०, फोर योनको रोयल जुत्तीले अमेरिकी डलर ४७५०र नेपेक्स इ–स्पोर्ट्सले अमेरिकी डलर १७५० नगद पुरस्कार प्राप्त गरेका छन् ।
पब्जी मोबाइल साउथ एशिया पब्लिसिङ लिड इसाकले नेपाली टोलीहरूको २०२५ पब्जी मोबाइल सुपर लिग सेन्ट्रल एन्ड साउथ एशिया फल सिजनमा देखिएको उत्कृष्ट प्रदर्शनप्रति गर्व गरन लायक रहेको बताए ।
'प्रत्येक सिजनसँगै प्रतियोगिताको स्तर झन् उचाइमा पुग्दै गएको छ। हामी सबै टोलीहरूलाई उनीहरूको प्रतिबद्धता, सीप र खेल भावना लागि बधाइ दिन चाहन्छौं। नेपालमा आगामी ग्रासरुट इभेन्ट्स हरू:- ट्रेनिङ ग्राउन्ड्स, ट्रेनिङ ग्राउन्ड प्रो, नेपाल सिरिज, क्याम्पस क्लब र स्टार च्यालेन्जको माध्यमबाट हामी ग्लोबल स्तरमा प्रतिस्पर्धा गर्न सक्षम स्थानीय टोलीहरूको अपेक्षा राख्छौं,' उनले भने ।
नेपाली इ–स्पोर्ट्स प्रशंसकहरूले यसपटक आफ्ना स्थानीय टोलीहरूले विश्वस्तरमा प्रतिस्पर्धा गरेको हेर्न नपाए पनि इ–स्पोर्ट्स वर्ल्ड कपमा हुने रोमाञ्चक खेल र विश्वस्तरीय टुर्नामेन्ट अनुभवले उत्साह अझै उच्च रहेको छ।
