आईसीटी समाचार
भारतको नवादा जिल्लामा साइबर ठगहरूले एक सेवानिवृत्त प्राध्यापकलाई डिजिटल गिरफ्तार गर्दै १४.३३ लाख भारतीय रुपैयाँ (२२.९५ लाख नेपाली रुपैयाँ) ठगेका छन् । ठगहरूले फोनमार्फत उनीमाथि कुनै गल्तीको कारण मुद्दा लाग्ने धम्की दिएर चार दिनसम्म डिजिटल गिरफ्तार गरेका थिए ।
उनीहरूले आफूलाई प्रवर्तन निर्देशनालय (ईडी) को अधिकारी भन्दै ह्वाट्सएप कल गरेर ठगी गर्ने गरेका छन् । ठगहरूले चार दिनसम्म “सोधपूछ" को नाममा सेवानिवृत्त प्राध्यापकको बैंक अकाउन्ट सम्बन्धी जानकारी समेत लिएका थिए । जब पीडितले ठगीको अनुभव गरे, उनले तुरुन्त साइबर थाना प्रहरीलाई जानकारी दिएका थिए । त्यसपछि नवादा साइबर थाना डीएसपीले मुद्दा दर्ता गरे र अनुसन्धान सुरु गरेको थियो ।
नवादा जिल्लामा यो सम्भवतः पहिलो पटक भएको डिजिटल गिरफ्तारको घटना हो, जहाँ साइबर ठगहरूले चार दिनसम्म एक सेवानिवृत्त प्राध्यापकलाई गिरफ्तार गरेर राखेका थिए । ठगहरूले १४ लाख ३३ हजार ४८७ भारतीय रुपैयाँ ठगी गरेका छन् । पीडित सेवानिवृत्त प्राध्यापक कामता प्रसाद सिंह, रजौली थाना क्षेत्रको अमावा गाउँका बासिन्दा हुन् ।
२४ देखि २७ डिसेम्बरसम्म ठगहरूले प्राध्यापकलाई डिजिटल गिरफ्तार गरेर राखे । ठगहरूले ह्वाट्सएप कलमार्फत ईडीको अधिकारी भन्दै उनलाई आफ्नो नाममा कैयौँ ठगीका मुद्दाहरू दर्ता भएको बताए ।
तुरुन्तै पैसा उनीहरूको खातामा ट्रान्सफर नगरेमा पक्राउ गरिने ठगहरूले धम्की दिएका थिए । त्यसपछि डरले, प्राध्यापकले पाँचवटा फिक्स डिपोजिट तोडेर भारतीय १४ लाखभन्दा बढी रुपैयाँ ठगहरूले बताएको खातामा ट्रान्सफर गरेका छन् ।
यस बीचमा ठगहरूले ईडी, सिबिआई र महाराष्ट्र पुलिसको नक्कल गर्दै ह्वाट्सएप कलमा प्राध्यापकसँग कुराकानी गर्ने गरेका थिए । उनीहरूले आधार कार्डबाट प्राध्यापकको फोटो स्क्यान गरी नक्कली वारेन्ट बनाएका थिए ।
उनीहरूले प्रध्यापकको मोबाइल नम्बरबाट कैयौँ ठगीका घटना भएका छन् र १५ वटा आपराधिक मुद्दा दर्ता भएको बताएका थिए । , “तपाईं पैसा ट्रान्सफर गरे मात्रै बच्न सक्नुहुन्छ, अन्यथा तुरुन्त गिरफ्तार हुनेछ,' ठगहरूले भनेका थिए ।
यस ठगीमा कम्तिमा चार–पाँच जना ठगहरूले विभिन्न अधिकारी बनेर प्राध्यापकसँग कुराकानी गरेका थिए । हाल, भारतको साइबर थाना प्रहरी यस घटनाको गहिरो अनुसन्धानमा जुटेको छ ।
