आईसीटी समाचार
“टुगेदर फर ए बेटर इन्टरनेट'' भन्ने नाराका साथ नेपालमा ६ फेब्रुअरी २०२४ मंगलबार सुरक्षित इन्टरनेट दिवस २०२४ मनाइएको छ ।
राष्ट्रिय बाल अधिकार परिषद् (एनसीआरसी) र चाइल्डसेफनेटले जेनुइन सेकेन्डरी स्कुल र वल्र्डलिङ्कको सहकार्यमा भक्तपुरमा ६ फेब्रुअरी २०२४ मा अनलाइन सेफ्टी इन्फोटेनमेन्ट कार्यक्रम आयोजना गरेको थियो ।
भक्तपुरस्थित जेनुइन सेकेण्डरी स्कुलले आयोजना गरेको कार्यक्रमको अध्यक्षता एनसीआरसीका सदस्य–सचिव तथा सिड समन्वय समिति नेपालकी अध्यक्ष इन्द्रादेवी ढकालले गरेकी थिइन् ।
नेपालमा बालबालिका विरुद्ध हुने अनलाईन अपराधको तथ्यांक साझा गर्दै उनले बालबालिकालाई अनलाइनबाटै जोगाउनु पर्ने महत्वलाई प्रकाश पारिन् । उनले भनिन्, ‘प्रविधि आफैमा नराम्रो होइन । हामीले प्रविधिको सुरक्षित प्रयोगमा चेतना जगाउन आवश्यक छ र एनसीआरसी अनलाइन बालबालिकाको सुरक्षा गर्न प्रतिबद्ध छ ।
विद्यालयका विद्यार्थीहरूले अनलाइन सुरक्षाको बारेमा सचेतना जगाउन अनलाइन सुरक्षा सचेतनामूलक गीत तथा नृत्य प्रस्तुत गरेका थिए । विद्यार्थीहरूले बालबालिकाको अनलाइन सुरक्षामा क्विज र बहसमा पनि भाग लिए ।
प्रख्यात कलाकार यमन श्रेष्ठले अनलाइन सुरक्षा सचेतनामूलक गीत प्रस्तुत गर्दै आफ्ना मिठा गीतहरू सुनाएर दर्शकलाई मनोरञ्जन दिएका थिए । कार्यक्रममा १० भन्दा बढी विद्यालयका ८०० भन्दा बढी बालबालिका तथा शिक्षकहरुको उपस्थिति रहेको थियो । कार्यक्रममा भक्तपुर नगरपालिकाका वडा सदस्य (वडा १० र ५), समाजसेवी तथा अभिभावकहरुको समेत सहभागिता रहेको थियो ।
युनिसेफ नेपालका बाल संरक्षण प्रमुख डान रोनोले भने, “सुरक्षित इन्टरनेटले बालबालिकालाई सिक्न र आफूलाई रचनात्मक रूपमा अभिव्यक्त गर्न मद्दत गर्छ र बालबालिकालाई अनलाइन सुरक्षा गर्ने जिम्मेवारी हामी सबैको हो "
सहभागीहरूलाई स्वागत गर्दै चाइल्डसेफनेटका संस्थापक तथा अध्यक्ष अनिल रघुवंशीले भने, “सुरक्षित इन्टरनेट दिवसले हामीलाई प्रविधिको सकारात्मक प्रयोग र बालबालिकालाई अनलाइन सुरक्षित गर्न हामी सबै मिलेर कसरी काम गर्न सक्छौँ भन्ने बारेमा कुरा गर्ने अवसर प्रदान गर्दछ ।" जेनयून माध्यमिक विद्यालयका प्रिन्सिपल अनन्त घिमिरेले शिक्षाका लागि सुरक्षित इन्टरनेट धेरै महत्त्वपूर्ण भएको र विद्यालयहरूले बालबालिकालाई सुरक्षित रूपमा इन्टरनेट प्रयोग गर्न सिकाउनु पर्ने बताए ।
बालबालिका र युवाहरूका लागि सुरक्षित, सकारात्मक र जिम्मेवार इन्टरनेट प्रवर्द्धन गर्न १७० भन्दा बढी देशहरूले वार्षिक रूपमा सुरक्षित इन्टरनेट दिवस मनाउँछन् ।
सुरक्षित इन्टरनेट दिवस २०२४ फेब्रुअरी ६ मा भए तापनि, चाइल्डसेफनेट र धेरै संस्थाहरूले हप्ता वा महिनाको कार्यहरू मार्फत इन्टरनेट सुरक्षाको अभियानलाई बढावा दिनेछन् ।
अभियानले सरकार, नीति निर्माता, कानून प्रवर्तन एजेन्सीहरू, दूरसंचार नियामकहरू, प्राविधिक कम्पनीहरू, इन्टरनेट सेवा प्रदायकहरू, मिडिया र अन्य कर्तव्य वाहकहरूलाई बालबालिका र युवाहरूका लागि इन्टरनेट सुरक्षित बनाउनको लागि आफ्नो जिम्मेवारी पूरा गर्न आह्वान गर्दछ । यसले युवा, अभिभावक, शिक्षक, सामाजिक कार्यकर्ता, निजी क्षेत्र, विद्यालयहरू र समुदायहरूलाई अझ राम्रो र सुरक्षित इन्टरनेट सिर्जना गर्न मद्दत गर्न आह्वान गर्दछ ।
बालबालिका र युवाहरूलाई अनलाइन सुरक्षा गर्न काम गर्ने विशेष संस्था चाइल्डसेफनेटले नेपालमा सुरक्षित इन्टरनेट दिवसको समन्वय र प्रवर्द्धन गर्दै आएको छ र सन् २०१९ देखि सुरक्षित इन्टरनेट दिवस राष्ट्रिय सचिवालयको रूपमा योगदान गर्दै आएको छ । साथै, सुरक्षित इन्टरनेट दिवस राष्ट्रिय समन्वय समिति पनि गठन गरिएको छ ।
यस वर्ष नेपालमा सुरक्षित इन्टरनेट दिवसको अवसरमा संयुक्त राष्ट्रसंघीय निकाय, आईएनजीओ, गैरसरकारी संस्था, सीबीओएस, निजी क्षेत्र र मिडिया हाउसलगायत ४४ वटा संस्थाले ऐक्यबद्धता जनाएका छन् ।
