आईसीटी समाचार
सामसङ इलेक्ट्रोनिक्सले मंगलबार दक्षिण कोरियास्थित रोबोटिक्स कम्पनी रेनबो रोबोटिक्सको सबैभन्दा ठूलो सेयरधनी बनेको घोषणा गरेको छ । कम्पनीले आफ्नो सेयर १४.७ प्रतिशतबाट ३५ प्रतिशत पुर्याउँदै २६७ अर्ब कोरियन वान (२४ अर्ब ८५ करोड बढी रूपैयाँ) मा हिस्सेदारी खरिद गरेको हो ।
इलेक्ट्रोनिक्स दिग्गज सामसङले सन् २०२३ मा १४.७ प्रतिशत हिस्सेदारीको लागि ८६.८ अर्ब कोरियन वान तिरेको थियो । यो नयाँ हिस्सेदारी खरिदले सामसङलाई आफ्नो रोबोटिक्स विभागलाई मजबुत बनाउन र ह्युम्यानोइड रोबोटहरूको विकासलाई तीव्र गर्न मद्दत गर्नेछ ।
अब रेनबो रोबोटिक्सलाई सामसङको सहायक कम्पनीको रूपमा समायोजन गरिनेछ र यो सम्झौता २०२५ को फेब्रुअरीमा सम्पन्न हुने अपेक्षा गरिएको छ ।
सामसङले आफ्नो प्रमुख कार्यकारी अधिकृतलाई प्रत्यक्ष रिपोर्ट गर्ने फ्युचर रोबोटिक्स अफिस स्थापना गर्ने योजना पनि बनाएको छ । यस सम्झौताले सामसङको पहुँचको प्रयोग गरी रेनबो रोबोटिक्सलाई अन्तर्राष्ट्रिय बजारमा विस्तार गर्न पनि सहयोग पुर्याउनेछ ।
रेनबो रोबोटिक्स सन् २०११ मा कोरिया एडभान्स्ड इन्स्टिट्युट अफ साइन्स एन्ड टेक्नोलोजी (KAIST) केन्द्रका अनुसन्धानकर्ताहरूले स्थापना गरेका थिए। यसले म्यानुफ्याक्चरिङ र ढुवानी क्षेत्रमा प्रयोगका लागि डुअल-आर्म मोबाइल म्यान्युपुलेटर र स्वचालित मोबाइल रोबोटहरू विकास गरेको छ । रेनबोमा हाल ८६ कर्मचारी कार्यरत छन्।
रेनबोका संस्थापक सदस्य डा. जुन-हो ओह, जो यस सम्झौताको अघि कम्पनीका सबैभन्दा ठूलो सेयरधनी थिए र KAIST का मानार्थ प्राध्यापक पनि हुन् । अब नयाँ फ्युचर रोबोटिक्स अफिस नेतृत्व गर्न सामसङमा रहनेछन् र सल्लाहकारको रूपमा भूमिका निर्वाह गर्नेछन् ।
सामसङ यो दौडमा सामेल भएको पछिल्लो कम्पनी हो, जसले स्वायत्त रूपमा काम गर्न सक्षम ह्युम्यानोइड रोबोटहरूको विकास गर्ने योजना बनाएको छ । माइक्रोसफ्ट र ओपनएआईले आफ्नो प्रविधि प्रयोग गरेर ह्युम्यानोइड रोबोट विकास गर्ने योजना बनाइरहेका छन्, भने टेस्लाले यसै वर्ष आफ्नो रोबोट अप्टिमस सार्वजनिक गरिसकेको छ। एनभिडियाले पनि जेटसन थोर नामक ह्युम्यानोइड रोबोटहरूको लागि नयाँ कम्प्याक्ट कम्प्युटरहरूको लाइन अर्को वर्ष सार्वजनिक गर्ने योजना बनाएको छ।
सन् २०२२ मा सामसङले रोबोटिक्स, एआई, ५जी, र अटोमोटिभ इलेक्ट्रोनिक्सलाई भविष्यका प्रमुख पहलको रूपमा चिनाएको थियो । यसले यी क्षेत्रहरूमा सम्भावित अधिग्रहणहरू आउनसक्ने संकेत पनि गरेको छ।
