आईसीटी समाचार
काठमाडौं । स्पोटीफाइले पोडकास्ट सिर्जनाकर्तालाई विज्ञापन तथा प्रिमियम सेवाबाट आम्दानी गर्ने अवसर प्रदान गर्ने ‘पार्टनर कार्यक्रम’ थप ३५ क्षेत्रमा विस्तार गर्ने भएको छ ।
कम्पनीका अनुसार आगामी शरद ऋतुमा इटाली, स्पेन, ब्राजिल, मेक्सिको, कोलम्बिया, पोल्यान्ड, चिली, डोमिनिकन रिपब्लिक र बहामासलगायत बजारमा कार्यक्रम लागू गरिनेछ । यससँगै पोडकास्ट सिर्जनाकर्ताले स्पोटीफाइमार्फत आफ्नो सामग्रीबाट आम्दानी गर्ने अवसर पाउने क्षेत्रको संख्या उल्लेख्य रूपमा बढ्नेछ ।
कार्यक्रममा योग्य ठहरिएका पोडकास्टरले अडियोसँगै भिडियो पोडकास्टबाट समेत आम्दानी गर्न सक्नेछन् । प्रिमियम सदस्यले हेरेका भिडियोमा आउने इम्प्रेसनलाई समेत आम्दानी गणनामा समावेश गरिने कम्पनीले जनाएको छ ।
त्यस्तै, नि:शुल्क सेवा प्रयोग गर्ने व्यक्तिले पोडकास्ट सुन्दा देखाइने विज्ञापनबाट उत्पन्न आम्दानीमा पनि सम्बन्धित पोडकास्टरले हिस्सा पाउनेछन् । स्पोटीफाइका अनुसार सिर्जनाकर्ताले आफ्नो पोडकास्ट अन्य प्लेटफर्ममा समेत वितरण गर्न सक्नेछन् । बाह्य प्रायोजनबाट प्राप्त आम्दानी भने पोडकास्टरले आफैं राख्न पाउने व्यवस्था गरिएको छ ।
टेकक्रञ्चका अनुसार स्पोटीफाइले यसअघि अमेरिका, युरोप र अस्ट्रेलियाका सीमित बजारमा पोडकास्ट पार्टनर कार्यक्रम सञ्चालन गर्दै आएको थियो । थप ३५ क्षेत्रमा विस्तार हुन लागेको यो कार्यक्रम कम्पनीको भौगोलिक रूपमा हालसम्मकै ठूलो विस्तार हो ।
स्पोटीफाइमा भिडियो पोडकास्टको लोकप्रियता पनि पछिल्ला वर्षमा बढेको कम्पनीले जनाएको छ । सन् २०२२ मा भिडियो पोडकास्ट सुविधा सुरु भएयता प्लेटफर्ममा यसको प्रयोग १४० प्रतिशतले वृद्धि भएको छ ।
त्यस्तै, जनवरीयता पोडकास्ट कार्यक्रमका लागि कम्पनीले गर्ने कुल मासिक भुक्तानी एक तिहाइले बढेको बताइएको छ । पोडकास्टबाट आम्दानी गर्न चाहने सिर्जनाकर्ताका लागि स्पोटीफाइले यसै वर्षको सुरुवातमा योग्यता मापदण्ड समेत परिमार्जन गरेको थियो ।
नयाँ व्यवस्थाअनुसार कम्तीमा तीनवटा एपिसोड प्रकाशित भएका, कुल २ हजार घण्टा सामग्री हेरिएको वा सुनिएको र पछिल्लो ३० दिनमा कम्तीमा १ हजार सक्रिय दर्शक वा श्रोता भएका सिर्जनाकर्ताले कार्यक्रमअन्तर्गत आम्दानीका लागि आवेदन दिन सक्नेछन् ।
कम्पनीका अनुसार नयाँ मापदण्ड लागू भएपछि कार्यक्रममा सहभागी पोडकास्टको सामाग्री प्रयोग औसतमा ४५ प्रतिशतले बढेको छ ।
