आईफोन प्रयोगकर्ताहरूलाई फेरि अलार्म समस्या, समयमै उठ्न नसक्दा जागिर र परीक्षा गुमेको गुनासो

यदि तपाईं आईफोन प्रयोग गर्दै हुनुहुन्छ र अलार्म सेट गरेर ढुक्कसँग सुतेका हुनुहुन्छ भने, तपाईंलाई धोका हुन सक्छ ।

धेरैजसो मानिसहरू बिहान उठ्न आईफोनमा अलार्म सेट गर्छन् र ढुक्क भएर सुत्छन्, तर उठेपछि उनीहरूलाई थाहा हुन्छ कि अलार्म नै बजेको छैन, र उठ्नुपर्ने समय गइसकेको छ । हाल फेरि एक पटक आईफोन प्रयोगकर्ताहरूले यो समस्या भोगिरहेका छन् ।

भर्खरै एप्पलले आईफोनका लागि नयाँ अपडेट रोल आउट गरेको छ । आईफोनको पछिल्लो सफ्टवेयर अपडेट आईओएस १८.२.१ हो । तर, पछिल्लो अपडेटपछि पनि केही प्रयोगकर्ताहरूले फोनमा क्लक एपको अलार्मसँग सम्बन्धित समस्याको सामना गरिरहेका छन् ।

यो कुनै नयाँ समस्या होइन । आईफोनको क्लक एपको अलार्म सेक्सनमा फेरि समस्या देखिएको छ । अप्रिल २०२४ मा पनि यस्तै समस्या देखा परेको थियो । त्यस समयमा कम्पनीले इन–बिल्ट अलार्म फिचरमा समस्या भएको स्वीकार गरेको थियो र यसलाई सुधार्ने कुरा भनेको थियो ।

लामो समयपछि फेरि यो समस्या प्रयोगकर्ताहरूले भोगिरहेका छन् । यसका कारण धेरै मानिसहरू काममा ढिला हुने समस्यामा परेका छन् । रेडईटजस्ता सामाजिक फोरमहरू आईफोनको अलार्मसम्बन्धी गुनासोले भरिएका छन् ।

प्रयोगकर्ताहरूले भनेका छन् कि एप्पलले अहिलेसम्म यो समस्याको मूल कारण पत्ता लगाउन सकेको छैन् । एक रेडईट प्रयोगकर्ताले अलार्म समयमा नबजेका कारण आफू समयमै उठ्न नसकेको र यसैका कारण आफ्नो जागिर गुमेको बताएका छन् । त्यस्तै, केही प्रयोगकर्ताहरूले अलार्मका कारण परीक्षा छुटेको पनि बताएका छन् ।

समाधान कहिले?

यसले प्रश्न खडा गरेको छ कि करोडौंको मूल्यांकन रहेको कम्पनीले अहिलेसम्म यो समस्याबाट प्रयोगकर्ताहरूलाई मुक्त किन गराउन सकेको छैन। केही मिडिया रिपोर्टअनुसार, एप्पलको आगामी आईओएस अपडेट १८.३ मा यो समस्याको समाधान हुने आशा गरिएको छ ।