आईसीटी समाचार
पछिल्लो समय आर्थिक मन्दीले गर्दा धेरैले रोजगारी गुमाउनु परेको छ । विश्वको ठूलो प्रविधि कम्पनी मध्येकको एक गूगलले पनि धेरै कर्मचारीलाई जागिरबाट हटाएको छ ।
कम्पनीबाट कर्मचारीहरूलाई निकाल्नुको सबैभन्दा ठूलो कारण लागत कटौती हो । तर सुरूवाती चरणमा कर्मचारी निकाल्दा धेरै खर्च हुन्छ । गूगल पनि यसको एक उदाहरण हो ।
भर्खरै जारी गरिएको एक प्रतिवेदनले गूगलले २०२३ को सुरूमा ठूलो संख्यामा कर्मचारी हटाउन अर्बौं डलर खर्च गरेको खुलासा गरेको छ । रिपोर्टका अनुसार गूगलले बर्खास्त गरिएका कर्मचारीहरूलाई क्षतिपूर्ति र अन्य खर्च तिर्न २.१ बिलियन डलर खर्च गरेको छ । यो सन् २०२३ को तथ्यांक मात्र हो ।
गूगलले २०२४ को पहिलो महिनामा कम्तिमा १००० थप कर्मचारीहरूलाई हटाउने घोषणा गरेको थियो । हालसम्म, यसले ७०० मिलियन डलर कर्मचारी कटौतीमा खर्च गरेको छ ।
जनवरी २०२३ मा गुगलले एउटा ठूलो निर्णय लिदै आफ्ना १२ हजार कर्मचारीहरूलाई हटाएको थियो, जुन विश्वव्यापी रूपमा ६ प्रतिशत थियो । यसको मतलब प्रत्येक १०० कर्मचारीमध्ये ६ जनाले कम्पनी छाड्नु परेको थियो ।
कम्पनीले दुई कारणले यो कदम चालेको हो । पहिलो, आर्थिक अनिश्चितता, अर्थात् भविष्यको आर्थिक अवस्थाबारे स्पष्टताको अभाव । दोस्रो, आफ्नो कार्यप्रणालीमा थप सुधार । गूगलको यो कदमले सम्पूर्ण टेक्नोलोजी उद्योगमा हेडलाइन बनायो । धेरै मानिसहरू चिन्तित थिए कि यो ठूलो आर्थिक मन्दीको संकेत हो ।
गुगलको भर्खरैको रिपोर्टले कर्मचारीहरूलाई बर्खास्त गर्दा कम्पनीमा कत्ति ठूलो प्रभाव परेको देखाएको छ । कम्पनीले कर्मचारी हटाउनमा २.१ बिलियन डलर खर्च गरेको छ, जुन गत वर्षको आम्दानीको ७ प्रतिशत हो ।
गूगलले धेरै कर्मचारीहरूलाई हटाए पनि कम्पनीको आम्दानी भने बढ्दै गएको छ । पछिल्लो त्रैमासिकमा कम्पनीको नाफा ८६.३ अर्ब डलर पुगेको छ, जुन गत वर्षको तुलनामा १३ प्रतिशतले बढी हो ।
सन् २०२३ मा गूगलको कुल आम्दानी ३०७.४ बिलियन नाघेको थियो । तर कम्पनीको आम्दानी विश्लेषकहरूले अपेक्षा गरे भन्दा कम थियो ।
