नेपालको सूचना तथा सञ्चार प्रविधि क्षेत्रमा महिलाको चुनौती र सम्भावना विषयमा अनुसन्धान सार्वजनिक गरिँदै

नेपालको सूचना तथा सञ्चार प्रविधि क्षेत्रमा महिलाको चुनौती र सम्भावना विषयक अनुसन्धान सार्वजनिक गरिँदै
अन्तर्राष्ट्रिय महिला दिवस २०२५ को अवसरमा सूचना प्रविधिमा महिला (डब्लुआईआईटी) ले फेब्रुअरी १८, २०२५ मा अनुसन्धान प्रकाशन कार्यक्रम आयोजना गर्ने भएको छ ।

कार्यक्रममा “बाधा तोड्दै: नेपालको सूचना तथा सञ्चार प्रविधि क्षेत्रमा महिला" (Barriers to Break through: Women In Nepal's Information and Communication Technology Landscape) शीर्षकको अध्ययन प्रतिवेदन सार्वजनिक गरिनेछ ।

उक्त अनुसन्धानले नेपालको सूचना तथा सञ्चार प्रविधि क्षेत्रमा महिलाहरूले भोग्नुपरेका चुनौती तथा अवसरहरू उजागर गर्ने लक्ष्य राखेको छ । साथै, महिलाहरूको सहभागिता, नेतृत्व र प्रभावकारी संलग्नता वृद्धि गर्नका लागि प्रमाणमा आधारित तथ्यांक र सिफारिसहरू प्रस्तुत गरिनेछ ।

दक्षिण एसियाका लागि अन्तर्राष्ट्रिय दूरसञ्चार संघ (आईटीयू) क्षेत्रीय कार्यालयकी प्रमुख डा. प्रणिता उपाध्याय पनि भर्चुअल रूपमा कार्यक्रममा सहभागी हुनेछिन् ।

कार्यक्रमको प्रमुख आकर्षण “सूचना तथा सञ्चार प्रविधि क्षेत्रमा महिलाको सहभागिता वृद्धि गर्ने मार्गचित्र" (Way forward to encourage more women in Information and Communication Technology) विषयक प्यानल छलफल हुनेछ । यस छलफलमा सरकार, शैक्षिक संस्था र निजी क्षेत्रका प्रतिनिधिहरूले नेपालमा महिलाहरूको आईसीटी क्षेत्रमा सहभागिता तथा नेतृत्व सशक्त बनाउने रणनीति पहिचान गर्नेछन् ।

यो अनुसन्धान सार्वजनिक कार्यक्रममा विभिन्न सरोकारवालाहरूलाई एक ठाउँमा ल्याएर आईसीटी क्षेत्रमा लैंगिक समावेशिता प्रवद्र्धन गर्ने महत्त्वपूर्ण कदम चालिएको हो । यस कार्यक्रमले महिला सशक्तीकरण, डिजिटल समानता र लैंगिक विभाजन हटाउने ठोस रणनीति निर्माण गर्ने उद्देश्य राखेको छ ।

कार्यक्रम फेब्रुअरी १८, २०२५ मा प्लाजा, पुल्चोक, ललितपुरमा दिउँसो २ः०० देखि ५ः०० बजे सम्म सञ्चालन हुनेछ ।

थप जानकारीका लागि यस वेवसाईटमा क्लिक गर्नुहोस् ।