आईसीटी समाचार
१९ वर्षिय सरोज भण्डारीले फेसबुकको बग (सुरक्षा कमजोरी) पत्ता लगाएका छन् । मुग घरभएका हाल ललितपुर बस्दै आएका भण्डारीले फेसबुकको बग पत्ता लगाएर ५०० अमेरिकी डलर अर्थात ५९ हजार नेपाली रूपैयाँ पुरस्कार पाएका हुन् ।
लक नभएको फेसबुक आईडिको फोन नम्बर राख्ने युआरएललाई कपी गरी लक भएको फेसबुक आईडीको युआरएलसँग रिप्लेस गरेर नयाँ फोन नम्बर राख्ने सकिने कमजोरी पत्ता लगाएको उनले बताए ।
‘यो बगको फाइदा उठाएर कुनै पनि व्यक्तिले कसैको लक भएको फेसबुक अकाउन्ट नियन्त्रणमा लिन सक्ने भयो,’ भण्डारीले आइसिटी समाचारसँग भने, ‘यो प्राइभेसीसँग सम्बन्धित बग भयो । त्यसपछि मैले फेसबुकलाई रिपोर्ट गरे ।’
उनले यो बगको रिपोर्ट एक महिना अगाडि गरेका थिए । त्यसपछि फेसबुकले उक्त बगलाई रिभ्यु गर्दै रिवार्ड दिएको हो । अहिले फेसबुकले उक्त बगलाई समाधान गरिसकेको छ ।
उनले रिपोर्ट गरेको यो पहिलो बग हो । पहिलो बगमा नै उनले सफलता हासिल गरेका हुन् । त्यसपछि पनि उनले ९ वटा बग रिपोर्ट गरे तर ती बग इनभ्यालिड भए । यी बगलाई सफ्टवेयर ग्लिच भन्दै फेसबुकले मार्क गरेको उनले जानकारी दिए ।
बग भ्यालिड भएसँगै उनी फेसबुकको ह्वाइच ह्याट थ्यांसको सूचीमा १६२ नम्बरमा रहेका छन् । भन्डारीले बग बाउन्टीको बारेमा लकडाउनमा बुझेका थिए ।
उनले भने ‘मैले बग बाउन्टीको बारेमा अवधारणा बुझेको २ दिनमै बगको रिपोर्ट गरेको थिए । त्यति खेर खासै ज्ञान थिएन् । मैले भोगिरहेको समस्यालाई चाहिँ रिपोर्ट गरे र रिपोर्ट गर्दा बगले मान्यता पायो ।’
उनले इन्टरनेटबाटै बगको बारेमा ज्ञान लिएका हुन् । बग भ्यालिड भएपछि उनले बग हन्टर आकाश जंग बस्नेतसँग भेट्ने मौका पाएका थिए । बस्नेतबाट बगको बारेमा ज्ञान लिइरहेको र यसको बारे अध्ययन पनि गरिरहेको उनी बताउँछन् ।
उनले होटेल म्यानेजमेन्ट प्लस टुबाट सकाएका छन् । उनलाई लुम्बिनी कलेजबाट बीसीएमा फुल स्कलरसीपको अफर आएको छ तर उनको योजना बीएससी सीएसआईटी अध्ययन गर्ने रहेको छ ।
