आईसीटी समाचार
ब्लुटिक नभएका प्रयोगकर्ताले अब दिनमा एक हजार ट्वीट मात्रै पढ्न सक्ने भएका छन् । ट्विटरका मालिक एलन मस्कले अबदेखि प्रमाणित भएका प्रयोगकर्ताले दिनमा १० हजार, प्रमाणित नभएका प्रयोगकर्ताले १ हजार र नयाँ अकाउन्टले ५०० ट्विट पढ्न सक्ने छन् ।
सुरूमा एलन मस्कले एक ट्विट गर्दै भुक्तान गरिएको अर्थात ब्लू टिक प्रयोगकर्ताहरूले एक दिनमा ६ हजार ट्विट, अप्रमाणित अकाउन्ट वा ब्लु टिक नभएको अकाउन्टले ६०० र अकान्ट खोलेको ३० दिन नपुगेका नयाँ अप्रमाणित प्रयोगकर्ताले ३०० ट्विट पढ्न पाउने व्यवस्था गरेका थिए ।
यो ट्विटको केही समयपछि मस्कले ब्लुटिक प्रयोगकर्ताका लागि पोस्ट पढ्ने सीमा बढाएर ८,०००, अप्रमाणित वा ब्लु टिक नभएका अकाउन्टका लागि ८०० र नयाँ अप्रमाणित प्रयोगकर्ताका लागि ४०० पुर्याएका थिए ।
पुनः मस्कले केही घण्टापछि अर्को ट्वीट गर्दै अब ब्लुटिक प्रयोगकर्ताले एक दिनमा १०,००० पोष्ट, अप्रमाणित खाताहरूले १,००० र नयाँ अप्रमाणित प्रयोगकर्ताहरूले ५०० ट्विट पढ्न सक्ने बताएका छन् ।
कम्पनीको पछिल्लो अपडेट अहिले लागू भएको छ । यदि कुनै प्रयोगकर्ताले निश्चित सीमा नाघ्यो भने, उसले ट्विटरसँग सम्बन्धित कुनै पनि सामग्री हेर्न सक्ने छैन ।
यो सीमा ट्विटरमा खाता हुने व्यक्तिहरूको लागि मात्रै हो । ट्विटरमा खाता नभएका व्यक्तिहरूले प्लेटफर्मसँग सम्बन्धित कुनै पनि सामग्री पहुँच गर्न सक्ने छैनन् ।
ट्विटर अहिलेसम्म पूर्ण रूपमा खुला प्लेटफर्म थियो, अर्थात्, ट्विटरमा अकाउन्ट नभएका मानिसहरूले पनि सेयर गरिएको ट्वीट वा महत्त्वपूर्ण ट्वीटहरू हेर्न सक्थे ।
यसका लागि उनीहरूलाई लगइन वा अकाउन्ट बनाउन आवश्यक पर्दैन थियो । तर अब मस्कले यसलाई परिवर्तन गरेका छन् र ट्विटरको लागि क्याटेगरी सीमा तोकेका छन् ।
पैसा तिरेर नीलो टिक किन्ने व्यक्तिले एक दिनमा अधिकतम ट्वीट पढ्न सक्नेछन्, निःशुल्क प्रयोगकर्ताले केही ट्वीट मात्रै हेर्न सक्नेछन् ।
डेटा चोरी रोक्नका लागि कन्टेन्ट पहुँच सिमित बनाएको मस्कको दावी छ ।
अहिलेसम्म जो कोहीले ट्विटरमा पहुँच गर्न सक्थे, जसका कारण ट्विटरको डेटा धेरै ठाउँमा फैलिएको थियो । एआई टुल्स आएपछि डेटा चोरी झनै तिब्र गतिमा बढ्दै गएपछि मस्कले यो महत्वपूर्ण निर्णय लिएका हुन् ।
